Son günlər yağan şiddətli yağışlar nəticəsində Qəbələnin Vəndam qəsəbəsində yerləşən Nohurgöl daşıb.Nəticədə ətraf ərazilər suyun içində qalıb. Ərazidə FHN-in Qəbələ Regional İdarəsinin əməkdaşları tərəfindən gölün səviyyəsinin normallaşdırılması və faunasına zərər dəyməməsi üçün profilaktiki tədbirlər aparılır. 

Qaxda isə güclü yağış və ardınca yağan dolu rayon mərkəzində, eləcə də rayonun Qaşqaçay və Armudlu kəndlərində fəsadlara səbəb olub. Sakinlərin dediyinə görə, təxminən noxud iriliyində yağan dolu ağaclarda yetişməkdə olan bütün meyvələri zədələyib, tərəvəz sahələri məhv olub. Kənd icra nümayəndəliyindən də bildirildi ki,  iki yanaşı kəndə uzun müddət yağan dolu demək olar ki, bütün fərdi təsərrüfatlara ziyan vurub. Dolu rayon mərkəzinə də təqribən 10 dəqiqə yağıb. Lakin daha xırda olduğuna görə fəsadsız ötüşüb. Yağışlar  Lahıc qəsəbəsi ərazisində növbəti dəfə torpaq uçqununa da səbəb olub. Hündür dağlardan gələn torpaq və daşlar avtomobil yoluna tökülüb. Avtomobillərin Lahıc, Sərdahar, Müdrüsə, Əhən, Burovdal, Vaşa, Yuxarı Zərnava, Namazgah, Güyüm kəndlərinə gediş-gəlişi dayanıb.  Yolun açılması üçün əraziyə ağır texnikalar cəlb olunub.

Şəkidə Azərbaycan heykəltaraşlıq məktəbinin banisi, unudulmaz sənətkar Fuad Əbdürəhmanovun xatirəsinə həsr olunmuş tədbir keçirilib. Heydər Əliyev mərkəzində baş tutan mərasimdə görkəmli heykəltaraşın ailəsi, Şəki şəhər icra hakimiyyətinin, Regional Mədəniyyət idarəsinin rəsmiləri və ictimaiyyət üzvləri iştirak edib. Çıxış edənlər Fuad Əbdürəhmanovun həyat və yaradıcılığından danışıblar. Daha sonra El televiziyasının hazırladığı “Monumental həyat” sənədli filmi nümayiş olunub. Filmdə Fuad Əbdürəhmanovun monumental yaradıcılığı, yaratdığı sənət əsərlərinin tarixi və bədii məziyyətlərindən bəhs edilir. Filmin ardınca tədbirin bədii hissəsinə start verilib. Milli musiqilər ifa edilib.

Şəki şəhər 7 saylı tam orta məktəbdə "28 may - Müstəqillik günü" münasibəti ilə şagirdlərin hazırladağı ədəbi-bədii proqram nümayiş olunub. Tədbir zamanı şəhid mayor Xəyal Məmmədovun adını daşıyan sinfin şagirdləri vətənpərvərlik mövzusunda şeirlər səsləndirib, mahnı və rəqslər ifa edib, Vətən müharibəsindən bəhs edən kompozisiya səhnələşdirilib. Sonda şagirdlər şəhid analarına hazırladıqları hədiyyələri təqdim ediblər.

2023-cü il üçün “Türk dünyasının turizm paytaxtı” seçilən Şamaxıda turizm potensialının inkişafı və qarşıda duran vəzifələrlə bağlı geniş müşavirə keçirilib. Rayon mədəniyyət mərkəzində keçirilən tədbirdə idarə, müəssisə və təşkilat rəhbərləri, turizm sektorunda çalışan sahibkarlar və rayon ictimaiyyəti qatılıb. Bu istiqamətdə qarşıda duran vəzifələrdən danışılıb. Tədbirdə Şamaxının turizm potensialını özündə əks etdirən videoçarx nümayiş olunub. Sonda rayon ictimaiyyəti adından Prezident  İlham Əliyevə müraciət qəbul edilib.

Şəkidə yük maşını aşıb. Hadisə səhər saatlarında şəhərin Süleyman Eldarov küçəsində baş verib. Şəhər sakini, 47 yaşlı Zaur Lətifov idarə etdiyi “KamAZ” markalı yük maşınının banında olan mişar daşını boşaltmaq istəyərkən maşın aşıb. Hadisə zamanı müxtəlif dərəcəli bədən xəsarətləri alan Zaur Lətivov Şəki Mərkəzi Rayon Xəstəxanasına aparılıb. Onun vəziyyətinin orta-ağır olduğu bildirilir.  

Şəkinin Cəfərabad kəndində məcrasından çıxan Böyük Dəhnə çayı evlərin həyətyanı sahələrini basıb. Eyni zamanda və həyətdə olan köməkçi tikililərə və zirzəmilərə su dolub. Səhər saatlarından müvafiq qurumların nümayəndələri əraziyə cəlb edilib. Mülki Müdafiə qüvvələrinin əməkdaşları həyətyanı sahələrə dolmuş sel sularını nasoslar vasitəsi ilə ərazidən kənarlaşdırıb. Lakin bəzi zirzəmilərə girmək çətin olduğu üçün su qalıb. Sakinlər Böyük Dəhnə çayında qabaqlayıcı tədbirlərin görülməsini istəyir. Onların sözlərinə görə, daşqına səbəb ərazidən keçən körpünün altındakı borudur. Borunun su ötürücülüyü az olduğu üçün  hər yağışda daşır.  Ərazidə olan Şəki Suvarma sistemləri idarəsinin nümayəndələri də vəziyyətlə tanış olublar. Qurum rəsmisi eyni zamanda məsələdən xəbərdar olan kimi, əraziyə texnika və canlı qüvvə cəlb edilərək problemin aradan qaldırıldığını bildirib. Hazırda Şəkidə yağıntılar davam edir. Vaxtaşırı leysan xarakterli olan yağıntılar Şəkidən keçən digər dağ çaylarında da suyun səviyyəsini artırıb. 

Balakən Rayon Polis şöbəsinə şəhər ərazisində yerləşən fərdi yaşayış evlərindən birinin həyətyanı sahəsində xeyli sayda çətənə kollarının əkildiyi barədə əməliyyat məlumatı daxil olub. Həmin ünvan dərhal nəzarətə götürülüb və keçirilmiş təxirəsalınmaz əməliyyat nəticəsində narkotik tərkibli bitkilərin kultivasiyası ilə məşğul olan Nazilə Hüseynova iş başında, yəni çətənə kollarına qulluq edən zaman yaxalanıb. Həyətyanı sahəyə baxış keçirilən zaman tərəvəz bitkiləri becərilən ərazidən 176 ədəd çətənə kolu aşkarlanıb. Nazilə Hüseynova ifadəsində narkotik tərkibli bitkilərə aqrotexniki qulluq göstərdiyini etiraf edib və onları becərməkdə məqsədinin yetişdirib qurutduqdan sonra satıb, yüksək qazanc əldə etmək olduğunu bildirib. Həmin çətənə kolları qablaşdırılaraq götürülüb və müvafiq ekspertizaya təqdim olunub. Nazilə Hüseynova isə təqsirləndirilən şəxs qismində istintaqa cəlb edilib. Şöbə əməkdaşları tərəfindən keçirilən növbəti əməliyyat zamanı isə yaşadığı evin həyətindəki istixanada külli miqdarda narkotik tərkibli bitkilər kultivasiya edən və narkotik vasitələrin satışı ilə məşğul olan Meşəşambul kənd sakini İsa Gözəlov tutulub. Həmin istixanaya baxış keçirilən zaman oradan ümumi çəkisi 40 kiloqrama yaxın 34 ədəd çətənə kolu və evin çardağında gizlətdiyi 7 kiloqram qurudulmuş marixuana aşkarlanaraq götürülüb. Faktlarla bağlı cinayət işi başlanılıb, saxlanılan şəxslərin ətrafında əməliyyat-istintaq tədbirləri davam etdirilir.

Şəkidə isə traktor qəza törədib. Hadisə rayonun Qırxbulaq kəndində baş verib. Belə ki, sahəyə kənd təsərrüfatı işlərini yerinə yetirmək üçün gedən traktor idarəetməni itirib, bu zaman sürücü özünü yola atıb. Sürücüsüz yoluna davam edən traktor divara çırpılaraq dayanıb. Hadisə nəticəsində traktorun sürücüsü, Şəki rayon sakini 67 yaşlı İsə Hüseinov  xəsarət alıb. İlkin tibbi yardım göstərilən yaralı Şəki Rayon Mərkəzi Xəstəxanasına çatdırılıb. Həkimlərin səylərinə baxmayaraq sürücü dünyasını dəyişib.