Ötən gündən başlayaraq Şamaxı sakinləri də Türkiyədə zəlzələdən zərərçəkmişlərə yardım kampaniyasına qoşulublar. Yardım aksiyasında yerli sakinlər, iş adamları, müəssisələr, idarələr könüllü olaraq iştirak edirlər. Böyükdən-kiçiyə hər kəs qardaş Türkiyədə zəlzələdən zərərçəkmişlərə yardım etmək üçün səhər saatlarından Şamaxı Olimpiya Mərkəzində təşkil edilən yardım toplanma məntəqəsinə gəlir, türk qardaşlarımıza dəstək olur. Rayon sakinləri isti geyimləri, əlcəkləri, corabları, yataq dəstlərini, quru ərzaqları, təmizləyici vasitələri təyin olunmuş məntəqədə çeşidləyirlər. Yardımlar toplanıldıqdan sonra yük avtomobillərinə yığılır. Son iki gündə 4 yük maşını Bakıya göndərilib. Günün sonuna kimi daha 4 yük maşını da göndəriləcək.

İsmayıllıda mağazalardan birinin kassasından soyğunçuluq yolu ilə 300 manat oğurlanıb. Polis əməkdaşlarının keçirdiyi əməliyyat nəticəsində qeyd edilən hadisəni törətməkdə şübhəli bilinən şəhər sakini, əvvəllər də narkotiklərlə əlaqəli cinayətlərə görə dəfələrlə məhkum olunmuş Ruslan Məmmədov tutularaq istintaqa təqdim olunub. Saxlanılan şəxsin yaşadığı evdə odlu silah gizlətdiyi də məlum olub. Həmin ünvana baxış keçirilərkən oradan lüləsi və qundağı kəsilmiş tüfəng aşkarlanaraq götürülüb. Faktla bağlı cinayət işi başlanılıb, Ruslan Məmmədov təqsirləndirilən şəxs qismində istintaqa cəlb edilib.

Şəkinin Aşağı Göynük kəndində Şamil Babayevə məxsus ümumi sahəsi 110 kv/m olan birmərtəbəli iki otaq və eyvandan ibarət fərdi yaşayış evində yanğın hadisəsi qeydə alınıb. Yanğının söndürülməsi üçün əraziyə Fövqaladə Hallar Nazirliyinin  Şəki rayon Dövlət Yanğından Mühafizə Hissəsinin iki yanğınsöndürən maşını və şəxsi heyəti cəlb edilib. Evin 90 kv/m-lik sahəsi və əşyaları yanıb. Yaxınlıqdakı tikililər yanğından mühafizə edilib. Hadisə nəticəsində xəsarət alan olmayıb.

Gəncə sakinləri Türkiyədə zəlzələdən əziyyət çəkənlərə yardım edirlər. Türkiyənin Gəncədəki Baş Konsulluğuna gələn insanlar lazımı ləvazimatları qonşu ölkəyə göndərirlər.

Kampaniyaya İmişli sakinləri də qoşulub. İmişli rayon Mədəniyyət mərkəzində qərargah yaradılıb. Dəstək kampaniyasına qoşulan vətəndaşlar isti geyimlər, həmçinin müxtəlif zəruri əşyalar gətirərək qərargaha təhvil verirlər. 

Lənkəranlılar da qardaş ölkədəki vəziyyətə biganə qalmır. Adi vətəndaşlarla yanaşı, yerli sahibkarlar isti geyimlər, yataq dəstləri, yorğan-döşəklər, zəruri məişət avadınlıqları, qızdırıcılar, tibbi ləvazimatları toplayaraq zəlzələdən ziyan çəkənlərə göndərirlər. Humanitar yardıma Masallı, Astara, Lerik, Yardımlı, Cəlilabad, Biləsuvar və digər rayon sakinləri də qoşulublar.

Türkiyədə baş verən güclü zəlzələdən zərər çəkənlərə yardım toplamaq üçün Qaxda da bir neçə ünvan ayrılıb. Səhər saatlarından başlayan yardım kampaniyası çərçivəsində ilk Tır qardaş öljəyə yola düşüb. Türkiyə üçün həmrəy olan Qax sakinləri yardım üçün hər zaman hazır olduqlarını söyləyiblər.

Zaqatalalılar da zəlzələdən zərərçəkənlərə yardım aksiyasına fəal qoşulublar. Aksiyada rayonda yaşayan bütün xalqların nümayəndələri yaxından iştirak edirlər. Vətəndaşlar minlərlə insanın ölümünə, böyük dağıntılara, yaşayış məntəqələrinin yerlə-yeksan olmasına, on minlərlə insanın yaralanmasına səbəb olan bu dəhşətli zəlzələdən sarsıldıqlarını bildirirlər.

Şəkidə də yardımların toplanması üçün xüsusi məntəqə yaradılıb. Toplanan əşyalar əsasən qış geyimləri, yorğan-döşək, quru yeməklərdir. Sakinləri bu humanitar aksiyaya fəal qoşularaq, hər zaman Türkiyənin yanında olduqlarını bildirirlər. Yardım aksiyaları davam edir.

Şamaxıda yanğın olub. Hadisə Şamaxı şəhərində, 48A məhəlləsində yerləşən evdə qeydə alınıb.  Rayon sakini Mahirə Cəbiyevaya  məxsus 4 otaqlı evdə baş verən yanğının söndürülməsinə FHN-in Şamaxı yanğından mühafizə hissəsinin əməkdaşları cəlb olunub. Yanğın nəticəsində evin yanar konstruksiyaları içərisindəki əşyalarla birlikdə yanıb. Yanğının ətraf ərazilərə keçməsinin qarşısı alınıb. Yanğın söndürülüb, xəsarət alan olmayıb.

Layihə çərçivəsində Zaqatala şəhərinin bütün ərazisini tam əhatə etməklə 106 küçə ağıllı işıq sistemi ilə təchiz olunacaq. Aparılan işlər çərçivəsində 54 km uzunluğunda yeraltı naqillər çəkilir, hər 30 metrdən bir olmaqla 1800 ədəd işıq dirəyi quraşdırılır. Küçələrin işıqlandırılması ilə paralel olaraq yol və səkilərin abadlaşdırılması işləri də aparılır. Ötən ilin sonlarından start verilən layihəyə yaxın günlərdə tam başa çatdırılacaq.

Qəbələ Rayon Polis Şöbəsinin əməkdaşları tərəfindən qeyri-qanuni ovçuluqla məşğul olan şəxslərin aşkarlanması istiqamətində növbəti tədbir keçirilib. Rayon sakini Vahid Qurbanov idarə etdiyi “VAZ-2107” markalı avtomobillə birgə saxlanılaraq şöbəyə gətirilib. Nəqliyyat vaitəsinə baxış keçirilərkən ovlanmış çöl donuzu aşkar edilib, Vahid Qurbanovun özündən isə müvafiq sənədləri olmayan tüfəng götürülüb. Faktla bağlı araşdırma aparılır.

İsmayıllıda yol qəzası olub. 18 yaşlı Nicat Gözəlli idarə etdiyi "VAZ 21 012" markalı avtomobillə hərəkətdə olarkən "Opel" markalı maşınla toqquşub. Hadisə zamanı sürücü Nicat Gözəlli ağır bədən xəsarətləri alıb. Avtomobildə sıxılmış vəziyyətdə qalan yaralı FHN-nin xilasediciləri tərəfindən çıxarılıb. Nicat Gözəlli təcili tibbi yardım stansiyasının avtomobili ilə İsmayıllı rayon Mərkəzi Xəstəxanasına aparılıb. Faktla bağlı araşdırma aparılır.

Qəbələdə yaşayış evində partlayış baş verib.Hadisə səhər saatlarında şəhər sakini İlkin Zəkəriyevə məxsus 130 kv m-lik yaşayış evində qeydə alınıb.İlkin ehtimala əsasən, partlayış məişət qazının sızması nəticəsində baş verib. Partlayış dalğasının zərbəsindən mətbəxin pəncərə çərçivələri yerindən çıxıb, soyuducunun arxa hissəsində elektrik naqilləri və mətbəxin lambirindən ibarət divar üzlüyü yanıb. Hadisə nəticəsində xəsarət alan olmayıb.