Arxada qoyduğumuz həftə havaların qeyri sabit keçməsi, intensiv yağışlar səbəbindən bir çox yerlər sel təhlükəsi yaşanması ilə yadda qaldı. Göyçayda, Göygöldə, Biləsuvarda ciddi təbii fəlaətlər yaşandı. Nəticədə Göyçayda və Göygöldə 4 nəfər təbiətin şıltaqlığının qurbanı oldu, Biləsuvarın 3 kəndi isə təhlükəsizlik səbəbi ilə evakuasiya olundu. FHN və ETSN qeyri sabit havanın qarşıdakı günlərdə də davam edəcəyi və bir sıra yerlərdə sel, daşqın təhlükəsi ilə bağlı əhaliyə xəbərdarlıq edib. “Davam edən intensiv yağışlar səbəbindən bir çox çaylarda gursululuq artıb. Hazırda biz Böyük Qafqazın dağ çaylarından biri olan Şəki şəhərinin şimal şərqində yerləşən Kiş çayındayıq. Ölkənin ən dağıdıcı çaylarından olan Kiş çayında sululuğun artmasını vizual olaraq görmək mümkündür. Bu isə ətraf ərazilərdə yaşayan sakinlər və çay ətraflarında dincəlmək istəyənlər üçün real təhlükə yaradır”. FHN və ETSN xüsusən çaylarda ciddi sel təhlükəsi olması ilə bağlı əhaliyə xəbərdarlıq edib. Bildirilib ki, xüsusən Böyük və Kiçik Qafqazın ətəklərində yerləşən Şəki, Qəbələ, Quba, Qusar, Göygöl və digər rayonların ərazisindən keçən dağ çaylarında, potensial sel təhlükəsi gözlənilir. Ancaq bütün bu xəbərdarlıqlara baxmayaraq yeni başlayan turizm mövsümi ilə əlaqədar bölgələrə istirahət məqsədi ilə yollananların bu xəbərdarlıqlardan ya xəbəri yoxdur, ya da əhəmiyyət vermirlər. Milli hidrometeorologiya xidməti xüsusilə də son bir neçə gün ərzində ölkə ərazisində hava şəraitinin qeyri-sabit keçəcəyi, yağıntıların bir sıra ərazilərdə intensiv olacağı, çaylarda sululuğun artacağı və bəzi çaylardan qısamüddətli sel və daşqın keçəcəyi, güclü külək əsəcəyini proqnozlaşdırır. Fövqəladə Hallar Nazirliyi isə əhaliyə bir daha müraciət edərək, gözlənilən hava şəraiti ilə əlaqədar müvafiq təhlükəsizlik qaydalarına riayət etməyə çağırır. Belə ki, yağıntılarla əlaqədar bəzi çaylarda mümkün sel və daşqından qorunmaq üçün sel və daşqın təhlükəli ərazilərdən uzaq durmaq, bu təhlükə ilə üzləşdikdə dərhal yaxınlıqdakı yüksəkliyə qalxmaq tövsiyə olunur.

Azərbaycanda ilk dəfə olaraq Hava Şarları Festivalı keçiriləcək. Hər il dünyanın müxtəlif ölkələrində keçirilən bu möhtəşəm festival iyunun 17-18-də Şamaxıda baş tutacaq. Şamaxı şəhərində baş tutacaq tədbirin ilk günü - iyunun 17-də layihənin iştirakçılar üçün təqdimatı keçiriləcək. Hava şarları, uçuş barədə məlumat veriləcək, əyləncə proqramı olacaq. İyunun 18-də isə Şamaxının Meysəri kəndi üzərindən səmaya müxtəlif rəngdə, fərqli forma və dizaynda hazırlanmış hava şarları qalxacaq. Uçuş Şamaxının tarixi və müasir mənzərəli yerlərini əhatə edəcək. Hava şarlarını beynəlxalq sertifikatlı pilotlar idarə edəcək. Festival turistlər üçün yeni, yerli əhali üçün isə tanış məkanları yüksəklikdən görmək, heyrətamiz peyzajdan zövq almaq üçün unikal imkandır. İştirakçılar Şamaxının əsrarəngiz mənzərəsini quş uçuşu hündürlüyündən izləyə biləcəklər. Qeyd edək ki, hava şarları festivalları Avstraliyanın Kanberra, Böyük Britaniyanın Bristol, İsveçrənin Şato-Do, İspaniyanın İgualada, Kanadanın Kvebek, Nyu Meksikonın Albukerke, Rusiyanın Velikiye Luki, Türkiyənin Kapadokiya və digər şəhərlərdə keçirilir. Ənənəvi keçirilməsi nəzərdə tutulan Hava Şarları Festivalının birinci ilinə giriş dəvətnamə ilə olacaq. Festivalın sonunda iştirakçılara uçuşdan xatirə olaraq sertifikatlar veriləcək.

Dövlət İmtahan Mərkəzinin məlumatına görə, 1 nəfər binanın girişində yoxlama zamanı üzərində olan mobil telefonu gizlətməyə cəhd etdiyi üçün imtahana buraxılmayıb.girişdə yoxlama zamanı məqsədli şəkildə mobil telefonu gizlətməyə çalışdığı üçün imtahan zalına buraxılmayan və ya imtahandan xaric olunanların nəticələri ləğv olunur və onlar yay qəbul imtahanlarına da buraxılmırlar. İmtahanda istifadə olunmuş qapalı və kodlaşdırıla bilən açıq tipli test tapşırıqlarının doğru cavab etalonları yaxın saatlarda Mərkəzin sosial şəbəkə hesablarına və saytına yerləşdiriləcək. Nəticələrin yaxın 2 həftə ərzində elan olunması nəzərdə tutulur.

Balakənin rayon mərkəzindən üzü bazara doğru gedən 150-200 metrlik bir yol var ki, sakinlər bu iki dəqiqəlik yolu günün müəyyən saatlarında 20 dəqiqəyə belə keçə bilmirlər. Bunun bir səbəbi bazar yolunda səkilərdə qurulan piştaxtalardısa, digər əsas səbəbi isə yol kənarlarında avtomobillərin uyğunsuz saxlamasıdır. Üstəlik bu yolun, rayonun mərkəzindən bazara aparan yeganə yol olduğunu nəzərə alsaq, ailəsinə bazarlıq etmək üçün vaxtaşırı bu yolu getmək məcburiyyətində qalan sakinlərin nəticədə əsəbləri tarıma çəkilir. Qaynar xəttimizə daxil olan bu problemin səbəbi və həll yollarını araşdımışıq. İzləyək... Balakən bazarına gedən yolun özü el əsl bazarı xatırladır. 100-150 mertlik bu yolun hər iki səkisində quraşdırılan piştaxtalarda müxtəlif ərzaq və qeyri ərzaq məhsulları satılır. Gigiyenik cəhətdən də uyğun olmayan bu vəziyyət yolda tıxacların yaranmasına səbəb olur. Bazar yolunda sasən günün səhər saatlarında sıxlıq müşahidə edilir. Bunun əsas səbəblərindən biri də həmin saatlarda bazar istiqamətinə satış üçün məhsul gətirən sakinlərin istifadə etdikləri nəqliyyatın, kəndlərdən və başqa ərazilərdən bazar istiqamətinə sərnişin daşıyan taksilərin və bu istiqamətdə fəaliyyət göstərən ərzaq və qeyri ərzaq mağazalarına yük gətirən iri tutumlu maşınların öz avtomobillərini uyğunsuz yerdə saxlamalarıdır. Yol kənarı ticarətlə məşğul olan satıcılar isə səkidə quraşdırdıqları piştaxtaların nəqliyyatın hərəkətinə heç bir təsir göstərmədiyini əsas gətirirlər. RPŞ əməkdaşları qanunsuz və uyğunsuz yerdə avtomobil və sərnişindaşıma vasitələrini saxlayan sürücülərə xəbərdarlıq edərək yolu boşaltmağa çalışsalar da bu, problemin həllinə gətirib çıxarmır. Nəticədə sözügedən ərazidə yenə də sıxlıq müşahidə olunur. Yol kənarında qurulan piştaxtalar isə insanların gediş gəlişinə mane olmaqla yanaşı, həm də şəhər mərkəzində olan bu yolun estetik görünüşünə xələl gətirir. Qanunsuz küçə ticarətinin qarşısının alınması məqsədilə polis əməkdaşları da fəaliyyətlərini davam etdirir. Bir sözlə, yol kənarında ticarətlə məşğul olanların da, taksi və başqa yük daşıma ilə məşğul olanların da özlərinə görə arqumenti var. Kimin haqlı, kimin isə haqsız olmasından asılı olmayaraq, problem sakinləri narahat edir. Ümid edirik, tezliklə məsələ hər tərəfin razı qalacağı şəkildə öz həllini tapacaq.

Şəkidə Ulu Öndər Heydər Əliyevin 100 illik və Milli Qurtuluş Gününün 30 illik yubileylinə həsr olunan “Heydər Əliyev ideyaları regional inkişafın əsas istinadgahıdır” mövzusunda konfrans keçirilib. Tədbirdə şəhər rəhbərliyi, Milli Məclisin deputatı, “Azərbaycan” qəzetinin baş redaktoru, ictimaiyyət nümayəndələri, ziyalılar, şəhid ailələri və müharibə veteranları iştirak ediblər. Konfrans iştirakçıları “Müstəqil Azərbaycan Heydər Əliyevin şah əsəridir”, “Heydər Əliyev Şəkinin yüksəlişinin və quruculuğunun banisidir”, “ “Heydər Əliyevin müəyyənləşdirdiyi düzgün strategiya Azərbaycanı Zəfərə apardı” və digər mövzularda məruzələr dinlənilib. Tarixi şəxsiyyətin yorulmaz, məqsədyönlü, ardıcıl və qətiyyətli mübarizəsi nəticəsində ölkəmizin hərtərəfli inkişafa nail olduğuna diqqət çəkilib.

Qəbələdə Fövqəladə Hallar Nazirliyi Mülki müdafiə qüvvələri və xüsusi xilasediciləri bir araya gəlib. Fövqəladə Hallar Nazirliyinin Qəbələ rayonunda keçirdiyi kompleks mülki müdafiə təlimlərində iştirakçıların fövqəladə vəziyyətə hazırlıq səviyyəsi yoxlanılıb. Qorxuya heç bir əsas yoxdur. Bu baş verənlər Fövqəladə Hallar Nazirliyinin Qəbələ rayonunda keçirdiyi kompleks mülki müdafiə təliminin ssenarisidir. \"İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin mövzusunda təşkil olan təlimdə FHN-in aidiyyəti qurumlarının nümayəndələri, rayon Fövqəladə Hallar Komissiyası (FHK), rayonun mülki müdafiə xidmətləri, ərazi və obyekt mülki müdafiə dəstələri iştirak ediblər. Təlim zamanı rayonun mülki müdafiə qüvvələri fövqəladə hadisənin baş verməsi barədə idarəetmə orqanlarının xəbərdar edilməsi, rayonun mülki müdafiə qüvvələrinin yüksək hazırlıq vəziyyətinə gətirilməsi, şəxsi heyətin \"xəbərdarlıq toplanış\" siqnalı üzrə fəaliyyəti, ərazinin kəşfiyyatının aparılması, məlumatların toplanması, təhlilinin aparılması, görüləcək qəza-xilasetmə işlərinin həcminin müəyyən edilməsi və təşkili işləri yerinə yetirilib. Bundan əlavə, təlim iştirakçıları xilasetmə və digər təxirəsalınmaz işlərin aparılması zamanı qarşılıqlı fəaliyyətin və idarəetmənin təşkili, xəsarət alanlara tibbi yardımın göstərilməsi, zərərçəkmiş əhalinin müvəqqəti olaraq təhlükəli zonalardan köcürülməsi və rayonun həyat təminatının bərpası tədbirləri də reallaşdırılıb. Tədbirin gedişində rayonun mülki müdafiə dəstələri və xidmətlərinin qarşılıqlı fəaliyyəti uğurla təşkil edilib və qarşıya qoyulmuş məqsədlərə nail olunub. Kompleks təlimə FHN-in ümumilikdə 354 nəfər şəxsi heyəti və 53 ədəd texnikası cəlb edilib. Qeyd edək ki, bu kimi təlimlər Fövqəladə Hallar Nazirliyi tərəfindən mütəmadi olaraq təşkil olunur.

Balakən Rayon Gənclər evində Atalar Məktəbi - Məsuliyyətli Atalığa Doğru layihəsi çərçivəsində gənc atalar və ata olmağa hazırlaşan gənclərlə görüş keşirilib. Layihənin əsas məqsədi Gənc ataları və ata olmağa hazırlaşan şəxsləri övladlarının inkişafı prosesində fəal iştiraka cəlb etməklə ailələrdə oturuşmuş gender-əsaslı stereotipik davranış normalarının dəyişdirilməsinə töhfə verməkdən ibarətdir. Layihə müddətində gender bərabərliyinin təmin olunmasında ataların rolu, gənc ata və ata olmağa hazırlaşan şəxslərin maarifləndirilməsi ilə gender əsaslı cins seçimi və digər zərərli təcrübələrlə mübarizə, məsuliyyətli atalığın düzgün aşılanmasını təmin etmək üçün təlim metodologiyalarının hazırlanması üzrə bilik, bacarıq və məlumatlılığının artırılması məqsədilə seminarlar keçiriləcək. 5 həftə olmaqla ümumilikdə altı ay davam edəcək. Avropa İttifaqının dəstəyi ilə həyata keçirilən layihə “Cənubi Qafqazda gender əsaslı cins seçimi və aidiyyəti zərərli təcrübələrin aradan qaldırılması” proqramı çərçivəsində BMT-nin Əhali Fondu , Əmək və Əhalinin Sosial Müdafiəsi Nazirliyi, Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə Azərbaycan Maarifçilər Assosiasiyası tərəfindən icra olunur.

Qaxda bir neçə gün öncə itkin düşən 70 yaşlı kişinin bu gün səhər saatlarında meyiti tapılıb. Rayon sakini Davud Yusifovun cansız bədəni Kürmük çayı yaxınlığında aşkar edilib. Meyitin üzərində yanıq xəsarətləri olub. Fakt üzrə Qax rayon prokurorluğunda araşdırma başlanılıb. Qeyd edək ki, 70 yaşlı Davud Yusifov mayın 25-i yaşadığı evdən çıxıb, geri qayıtmayıb. #kanals#xəbər#qax#hadisə

Abone OL: https://goo.gl/W99fFm Copyright © Kanal S_official Sayt: https://kanal-s.az Facebook: https://goo.gl/XVhVzG Şəkidə günün istənilən saatında insanların ən çox hərəkət etdiyi mərkəzi küçələrdə itlərin sürü halında gəzdiklərini müşahidə etmək olar. Son zamanlar itlərin insanlara hücum faktları da artmağa başlayıb. Təkcə 2023-cü ilin yanvarından bu yana Şəkidə 370 nəfər rayon xəstəxanasına itdişləməsi ilə bağlı müraciət edib. Mayın əvvəlində Cəlilabadda 11 yaşlı qızın it dişləməsindən ölməsi isəinsanları daha çox narahat edib. Əksər rayonların əsas probleminə çevrilən bu məsələnin həlli ilə bağlı isə demək olar heç bir ciddi addım atılmır. Aidiyyatı qurumlar ancaq masa arxasında müzakirə etməklə kifayətlənir və heç bir fəaliyyət istiqaməti seçilmir. Problemə müdaxiləsiz keçən hər gün isə sahibsiz, ac və susuz şəhərdə dolaşan itlərin və hücumlarının daha da artmasına səbəb olur. Şəkidə sahibsiz itlər sakinlər, xüsusən də azyaşlılar üçün ciddi təhlükə mənbəyinə çevrilib. Tez-tez sahibsiz itlərin ətrafdakı insanlara hücum etməsi insanlarda təşviş yaradıb. Çünki bu cür itlər quduzluq və digər yoluxucu xəstəliklərin daşıyıcısı ola bilər. Küçədəki canlıları sevən, onların qayğısına qalanlar da az deyil. Ancaq bu itlərin quduz olma ehtimalı insanları onlardan çəkinməyə vadar edir. Son zamanlar it dişləmələri ilə bağlı faktlar durmadan artsa da aidiyyatı qurumlar problemin həll olunması istiqamətində heç bir addım atmır. Rayonun baytar həkimi problemin qarşısını qismən də olsa almaq üçün müxtəlif ərazilərə aldadıcı yemlər paylanıldığını bildirir. Şəki Şəhər İcra Hakimiyyətindən isə şifahi olaraq bildirildi ki, bu problemin həlli istiqamətində müəyyən təkliflər hazırlanıb və aidiyyəti dövlət orqanları ilə məsləhətləşmələr aparılıb. Ekspertlər hesab edir ki, problemin qarşısını almaq üçün tək sığınacaqların yaradılması yetərli deyil. Bunun üçün xarici ölkə təcrübəsindən yararlanmaq və məsələni kükndən həll etmək lazımdır. Qeyd edək ki, 2023-cü ilin cari dövrü ərzində 3223 nəfər heyvan hücumuna məruz qalıb. Bunlardan 2676-sı it dişləmələridir. Heyvan dişləməsi nəticəsində 2 quduzluq hadisəsi baş verib. Bir nəfərsə həyatını itirib...