Daha bir ailə münaqişəsi qətl ilə yekunlaşıb. Hadisə gecə saatlarında Zaqatalanın Yuxarı Çardaqlar kəndində baş verib. Kənd sakini 37 yaşlı Qılman Həsənov münaqişə zəminində kəsici alətlə həyat yoldaşı 37 yaşlı Xavər Həsənovanın boğaz nahiyəsini kəsərək qətlə yetirib. Daha sonra Qılman Həsənov özünün də boğaz nahiyəsini kəsərək intihar edib. İlkin araşdırma zamanı qətlin bəzi təfərrüatları məlum olub. Xavər Həsənova Yuxarı Çardaqlar kənd tam orta məktəbində ibtidai sinif müəllimi işləyirmiş. Qətli törədən Qılman Həsənov isə uzun müddət qonşu Rusiyada yaşayıb. O, bir müddət əvvəl Zaqatalaya qayıdıb. Ailənin bir qız, bir oğlan olmaqla azyaşlı iki övladı var. Hadisə baş verən zaman uşaqlar ata babasıgildə olublar. Hadisənin qısqanclıq və ailə münaqişəsi zəminində baş verdiyi ehtimal olunur. Faktla bağlı cinayət işi başlayıb, araşdırma aparılır.

Şəkidə ümumşəhər iməciliyi keçirilib. İməcilik zamanı Şəkinin bir sıra ərazilərində, təmizlik və abadlıq işləri aparılıb. Yolların ətrafı qurumuş alaq otlarından təmizlənib, daş, qum və torpaq qalıqları yığılaraq ərazidən kənarlaşdırılıb. Gün ərzində davam edən iməcilik zamanı məzarlıq ərazisində olan ağac və gül kollarına aqrotexniki qulluq göstərilib. Bu işlərdə kommunal xidmət əməkdaşları ilə yanaşı sakinlər də yaxından iştirak ediblər. 

Vətən müharibəsi qəhrəmanı, kapitan İsmayıl Səmədovun adını daşıyan Zaqatala şəhər 5 saylı tam orta məktəbində “Zəfər tariximizi yaşadaq” adlı tədbir keçirilib. Tədbirə Rayon İcra Hakimiyyətinin,Təhsil Şöbəsinin nümayəndələri, 44 günlük Vətən müharibəsində iştirak edən qazilər və qəhrəman şəhidimiz İsmayıl Səmədovun ailəsi qatılıb. Çıxış edənlər Vətən müharibəsindən danışaraq, bu şanlı tarixin hər bir azərbaycanlı üçün qürur yaddaşı olduğunu qeyd ediblər. Vurğulanıb ki, ali baş komandanın başçılığı ilə dəmir yumruq kimi birləşən Azərbaycan xalqı düşmənə layiqli cavabını verib.  Zəfər tariximizin gələcək nəsillərə ötürülməsinin vacibliyini də qeyd olunub. Tədbir şagirdlərin hazırladığı ədəbi -bədii kompazisiya ilə davam edib .

Ümummilli lider Heydər Əliyevin anadan olmasının 99-cu ildönümü münasibətilə Şəki rayonu ərazisində fəaliyyət göstərən idarə, müəssisə və təşkilatlar arasında futzal üzrə “Şəki kuboku – 2022” turniri start götürüb. Turnirin açılış mərasimdə şəhərin rəhbər şəxsləri, komandalar və ictimaiyyət nümayəndələri iştirak edib. Bildirilib ki, turnirin keçirilməsində əsas məqsəd Ümummilli liderin xatirəsini anmaq, təşkilatlar arasında dostluq münasibətləri formalaşdırmaqdır. Dövlət himninin səslənməsilə turnir açıq elan olunub. İlk oyun Şəki şəhər icra hamiyyətinin komandası ilə “Marxal” komandası arasında baş tutub. Qeyd edək ki, 4 qrupda 20 komandanın mübarizə aparacağı turnir mayın 10-dək davam edəcək. 

Antibiotiklər – bakteriyaların inkişafını dayandıran və ya onları məhv edən kimyəvi maddələrdir. Hansı ki, antibiotiklər aşkar edilənə qədər infeksion xəstəliklər milyonlarla insan ölümünün əsas səbəbi idi. İlk vaxtlar bir sıra ağır bakterial xəstəliklərin müalicəsi kimi istifadə olunan antibiotiklər hazırda bəsit qrip zamanı belə insanlar tərəfindən müraciət olunan ilk ünvandır. Əksər xəstəlikdə xilaskar kimi gördüyümüz bu dərman vasitələri bir çox yan təsirlərə də malikdir. Mütəxəssislər bildirirlər ki, antibiotiklərdən istifadə orqanizmdəki bakteriyaları məhv etsə də, onun uzun müddət və yersiz istifadəsi həzm pozğunluğu, bağırsaqlarda narahatlıqla nəticələnə, mərkəzi sinir sistemində bəzi nasazlıqlara səbəb ola bilər. Həkim xüsusilə vurğulayır ki, antibiotiklərdən daimi istifadə etmək olmaz, çünki bu zaman orqanizmdə ona qarşı immunitet yaranır. Bununla da orqanizmimiz bir çox infeksiyalar qarşısında müdafiəsiz vəziyyətə düşür. Ancaq təəsüf ki, bir çox vətəndaş müxtəlif səbəb və bəhanələr gətirərək həkimə müraciət etməkdənsə özləri özlərini sağaltmağa üstünlük verir. Əsas da valideynlər uşaq xəstələnən kimi ilk olaraq antibiotiklərə üz tutur. Halbuki uşağın tez sağlamlığına qovuşması üçün yardım etdiyini düşünən valideynlər ona daha çox ziyan verdiyini düşünmürlər. Dünyanın bir çox ölkəsində sərbəst şəkildə antibiotik almaq mümkün deyil. Antibiotiklər yalnız resept əsasında təyin edilir və həkimin məsləhəti əsasında istifadə edilir. Odur ki, hətta ölümə belə yol açan bu dərmanlardan düzgün və təyinatına uyğun şəkildə istifadə etmək, xeyrini görmək üçün həkimə müraciət etmək önəmlidir. 

Şəkidə fermerlərlə maarifləndirici seminar keçirilib. Yaz aylarında taxıl sahələrində alaq otlarına qarşı mübarizənin aparılmasına həsr edilmiş seminarda fermerləri maraqlandıran suallar cavablandırılıb. Bildirilib ki, 1300 hekar sahədə bu günə qədər siçanabənzər gəmiricilərə qarşı müabrizə tədbirləri görülüb. 25 min hektardan çox sahədə alaq otlarına qarşı mübarizə aparılıb və bu, davam etməkdədir. Seminarda taxıl sahəsində istifadə edilən preparatlar barədə məlumat verilib. Həmçinin dərmanın vurulma qaydaları əyani şəkildə göstərilib. Bildirilib ki, əgər sahəni 5-10% alaq otları basırsa, bu ən azı 10-15% məhsul itkisi deməkdir. Ona görə də mübarizəni həm vaxtında, həm də düzgün şəkildə aparmaq lazımdır. Həmçinin sahələrin dərmanlanması zamanı təhlükəsizlik qaydalarına mütləq şəkildə riayət edilməlidir. Belə tədbirlərin bundan sonra da davam etdiriləcəyi vurğulanıb.  

Bu gün ölkənin 12 şəhər və rayonunda  9-cu sinif şagirdləri üçün buraxılış imtahanı keçirilib. İmtahan keçirilən şəhər və rayonlarda ümumilikdə 100 imtahan binası, 1750 imtahan zalı ayrılıb. Yazılı cavab tələb edən tapşırıqların yoxlanılması vaxt tələb etdiyi üçün imtahan nəticələrinin 3 həftə ərzində elan olunması nəzərdə tutulur. Bu gün, həmçinin tədrisi gürcü dilində olan məktəblərin şagirdləri də imtahan veriblər. Əməkdaşlarımız prosesi Qax rayonunda izləyib. Qaxda keçirilən buraxılış imtahanında 618 nəfərin iştirakı nəzərdə tutulub. İmtahanların idarə olunmasına 8 imtahan rəhbəri və 58 nəzarətçi-müəllim cəlb edilib. İmtahanların keçirilməsi üçün 49 zal ayrılıb. Çəkiliş apardığımız Tofiq İsmayılov adına 5 saylı orta məktəbdə bir şagirddə telefon aşkar olunduğundan, o, imtahandan xaric edilib.