Qarabağda keçirilən antiterror tədbirləri zamanı şəhid olan Vüsal Şəhriyarovun il mərasimi keçirilib. Onun doğulub boya-başa çatdığı Qobustanın Çalov kəndində keçirilən il mərasimdə RİH-nin, hüquq mühafizə orqanlarının rəhbərləri, şəhidin ailə üzvləri, İctimaiyyətinin nümayəndələri iştirak ediblər.

İlk öncə şəhidin məzarı ziyarət olunub, ruhuna dualar oxunub. Daha sonra Şəhid bulağının qarşısında davam edən tədbirdə çıxış edənlər Şəhid Vüsal Şəhriyarovun şərəfli ömür yolundan, qəhrəmanlıqlarından söz açıblar.

Vətənimizin bütövlüyü uğrunda mübarizədə canlarından keçmiş şəhidlərin əziz xatirəsini daim uca tutulduğu vurğulanıb. Qeyd edək ki, Şəhid Vüsal Şəhriyarov Tovuz döyüşləri və Vətən Müharibəsində artilleriya bölməsində xidmət edib.

" Kəlbəcərin alınmasına görə" medalı ilə təltif edilib. 2020-ci ildə hərbi xidməti bitirərək ehtiyata buraxılan Vüsal 2023-cü ildə komando hazırlıq kursuna daxil olub, yenidən hərbiyə qayıdıb. O, 2023-cü ildə Qarabağ iqtisadi rayonunda keçirilən antiterror tədbirləri zamanı qəhrəmancasına şəhid olub.

Şamaxı Rayon Polis Şöbəsinin əməkdaşlarının keçirdikləri əməliyyat zamanı cibgirlik edın əvvəllər dəfələrlə məhkum olunmuş Tahir Abdullayev və Səlvər Salmanov saxlanılıblar.

Onların rayon ərazisində yerləşən bazarda zərərçəkənlərdən birinin cibində olan 3400 manatı oğurladıqları müəyyən edilib. Faktla bağlıı cinayət işi başlanılıb, hər iki şəxs barəsində məhkəmənin qərarı ilə həbs qətimkan tədbiri seçilib.

Araşdırmalar davam etdirilir. Bu şəxslərin əməllərindən zərər görən başqa vətəndaşlar varsa polis orqanlarına məlumat verə bilərlər.

Şəkidə avtomobil obyektə çırpılıb. Bu gün səhər saatlarında Şəkinin Sabit Rəhman küçəsində "Mercedes" markalı avtomobil fotostudioya çırpılıb.

Şahidlərin sözlərinə görə, hadisə sürücünün qəfil qarşısına çıxan uşaqdan yayınmaq istəməsi nəticəsində baş verib. Xoşbəxtlikdən xəsarət alan olmayıb. Ancaq obyektə ziyan dəyib. Faktla bağlı araşdırma aparılır.

Şəkinin Aşağı Laysqı kəndində şəhid Bəxtiyar İdrisovun xatirəsi anılıb. Şəhidin məzarı kənd sakinləri, qazilər, şəhidin ailə üzvləri, ictimaiyyət nümayəndələri ziyarət edib, ruhuna dualar oxunub. Çıxış edənlər 19 yaşında şəhadətə ucalan Bəxtiyarın qısa, ancaq şərəfli ömür yolundan danışıblar. Bildirilib ki, qalib, mərd, cəsur əsgər kimi Bəxtiyar İdrisov qarşıya qoyulan tapşırıqları layiqincə yerinə yetirib. Vurğulanıb ki, məhz belə qəhrəmanlar sayəsində vətən torpağı düşmən tapdağından azad edilib və ərazi bütövlüyümüz bərpa olunub. Uşaqlıqdan vətən torpaqlarının yağı tapdağından azad edilməsi, işğalçıların qovulması arzusu ilə alışıb yanan Bəxtiyar 2022-ci ildə təhsilini yarımçıq saxlayaraq hərbi xidmətə yollanıb. 2023-cü ilin 19-20 sentyabr tarixlərində keçirilən antiterror tədbirləri zamanı Ağdamın Sırxavənd kəndi istiqamətində gedən döyüşlərdə qəhrəmancasına şəhid olub.

Oğuzda həmkəndlisinin evindən oğurluq edən şəxs tutulub Oğuz rayonunun Xaçmaz kəndində yerləşən evlərin birindən oğurluq edilib. Ev sahibi 2000 manat pulun, qızıl-zinət və məişət əşyalarının naməlum şəxs tərəfindən oğurlanması barədə polisə məlumat verib. Rayon polis şöbəsinin əməkdaşlarının həyata keçirdikləri tədbirlərlə əməli törətmək şübhəli bilinən zərərçəkmişin həmkəndlisi, əvvəllər də məhkum olunmuş Polad İbrahimov saxlanılıb. O, oğurladıqlarının bir qismini Gəncə və Qəbələdə satdığını bildirib. Faktla bağlı cinayət işi başlanılıb, məhkəmənin qərarı ilə P.İbrahimov barəsində həbs qətimkan tədbiri seçilib. Araşdırmalar davam etdirilir.

Hadisə rayonun Soltan Mehdiyev məhəlləsində qeydə alınıb. Belə ki, rayon sakini Babək Abbasova məxsus ümumi sahəsi 250 kv metr olan birmərtəbəli ev, evə bitişik quraqlıq və tövlə yanıb, eləcə də tövlədə olan ev quşları tələf olub.

Bundan başqa tövlədə olan 20-25 tona yaxın ot bağlaması yanaraq külə dönüb. Hadisə yerinə FHN-nin İsmayıllı rayon dövlət yanğından mühafizə hissəsinin canlı qüvvəsi və texnikası cəlb olunub. Yanğın söndürülüb və ətrafa yayılmasının qarşısı alınıb. Hazırda fakt araşdırılır.

Balakən rayonunda polis əməkdaşları sərhədçilərlə birgə narkotik vasitələrin qanunsuz dövriyyəsi ilə məşğul olan, eləcə də qanunsuz odlu silah-sursat saxlayan şəxslərə qarşı əməliyyatlar keçirilib. Yüksək dağlıq ərazilərdə həyata keçirilən əməliyyatlar zamanı 3 narkotik plantasiyası aşkar edilib.

Çətənə kollarını əkən 5 nəfər müəyyən olunaraq saxlanılıb. Onlardan 290 ədəd çətənə kolu “Kalaşnikov” avtomatı, daraq, patronlar və ov tüfəngləri aşkarlanaraq götürülüb. Saxlanılan şəxslər çətənə kollarını qazanc əldə etmək məqsədilə əkdiklərini və aqrotexniki qulluq göstərdiklərini bildiriblər. Faktlarla bağlı cinayət işi başlanılıb, əməliyyat-istintaq tədbirləri davam etdirilir.

Şəkidə ağacəkmə aksiyası keçirilib. Şəki Reabilitasiya Mərkəzi tərəfindən 21 nömrəli tam orta məktəbin qarşısında keçirilən aksiyada mərkəzin əməkdaşları, müharibə iştirakçıları və 21 nömrəli tam orta məktəbin kollektivi iştirak edib. Aksiya zamanı 64 ədəd şam ağacı və müxtəlif meyvə ağacları əkilib, ağaclara aqrotexniki qulluq göstərilib.

Şəkidə iki avtomobil toqquşub. Hadisə bu gün Şəkinin Cəfərabad kəndi ərazisində qeydə alınıb. Belə ki, Kiçik Dəhnə kənd sakini Röyal Məmmədovun idarə etdiyi "Opel" markalı avtomobil ilə həmin kənd sakini Rəhman Mustafayevin idarə etdiyi "Changan" markalı avtomobil toqquşub. Toqquşma nəticəsində "Changan" yoldan çıxaraq dərəyə aşıb. Nəticədə avtomobilin sürücüsü - Rəhman Mustafayev və sərnişini xəsarət alıb. Faktla bağlı araşdırma aparılır.