Şəki Mediasiya Şurasının təşkilatçılığı ilə “Barışıq sazişlərinin keyfiyyətli məzmunu” adlı seminar keçirilib. Tədbirdə ölkənin müxtəlif bölgələrindən 30-dan çox mediator, iştirak edib. Çıxış edənlər ölkəmizdə aparılan mediasiya islahatlarının artıq öz müsbət bəhrəsini verdiyini bildiriblər.

Mediasiya institutu haqqında ətraflı məlumat və tövsiyələr verilib. Seminarda mediatorların ailə və əmək mübahisələrinin həllində rolu, əldə edilən nailiyyətlər və qarşılaşdıqları çətinliklər müzakirə edilib. Sonda iştirakçıların sualları cavablandırılıb, mediasiya sahəsində təklif və tövsiyələri dinlənilib.

Qəbələdə bədbəxt hadisə baş verib. 54 yaşlı Araz Allahverdiyev odlu silahdan açılan atəş nəticəsində xəsarət alıb. Araşdırma zamanı həmin şəxsin ov tüfəngi ilə ehtiyatsız davranması zamanı xəsarət aldığı müəyyən edilib.

Xəstəxanaya yerləşdirilən Araz Allahverdiyevin qolu amputasiya olunub. Faktla bağlı araşdırma aparılır.

Şəki şəhər 5 nömrəli tam orta məktəbdə həmin məktəbin məzunu olmuş Vətən müharibəsi şəhidləri – mayor Xəyal Məmmədov və əsgər Şahmar Soltanlının xatirə lövhəsinin açılışı olub.

Tədbirdə məktəbin müəllim-şagird kollektivi, şəhid ailələri və ictimiyyət nümayəndələri iştirak ediblər. Çıxış edənlər qəhrəman şəhidlərimizin şərəfli ömür yolundan bəhs edilib. Onlarla bağlı xatirələrini bölüşüblər.

Vurğulanıb ki, şəhidlərimizin xatirəsinin əbədiləşdirilməsi gələcək nəsillərə tanıdılması baxımından mühüm əhəmiyyət daşıyır. Sonda şagirdlərin ifasında ədəbi-bədii kompozisiyalar nümayiş etdirilib. Ardınca şəhid Şahmar Soltalı və Xəyal Məmmədovun xatirə lövhəsinin açılışı baş tutub.

Qida Təhlükəsizliyi Agentliyinin müfəttişləri Rayon Polis Şöbəsinin əməkdaşları ilə birgə Şəkidə keçirdiyi reyd zamanı bir neçə ət satışı fəaliyyəti ilə məşğul olan obyektlərdə qanun pozuntuları aşkarlanıb. Belə ki, ət məhsullarının saxlandığı köməkçi sahənin sanitariya norma və qaydalarının, gigiyena normativlərinin tələblərinə cavab vermədiyi və antisanitar vəziyyətdə olduğu müəyyən edilib.

Aşkar edilmiş uyğunsuzluqlarla bağlı sahibkar barəsində inzibati xəta haqqında protokol tərtib edilib, həmin sahənin fəaliyyəti məhdudlaşdırılıb. Reyd zamanı həmçinin baytarlıq-sanitariya ekspertizası aparılmadan həyata keçirilən heyvan kəsimi və ət satışı məntəqələri aşkar olunub.

Aşkar edilmiş faktla bağlı qanunvericiliyin tələblərinə uyğun müvafiq tədbirlər görülüb. Agentlikdən yoxlama-nəzarət tədbirlərinin bundan sonra da davam etdiriləcəyi bildirilib. Məqsəd ölkədə heyvan kəsiminin müasir tələblərə uyğunlaşdırılması və qanunsuz heyvan kəsiminin qarşısının alınmasıdır.

Şəkidə fəaliyyət göstərən marşrut avtobuslarının əksəriyyətinin istismar müddəti başa çatıb. Günün tələblərinə cavab verməyən nəqliyyat vasitələri təmirsiz yollarda daha da sıradan çıxıb. Sərnişin daşımaq üçün yararsız olan köhnə, nasaz avtobusların fəaliyyətindən haqlı olaraq sərnişinlər narazıdır.

Sınıq-salxaq oturacaqlar, təmizlənsə belə çirkli görünən avtobuslarda sərnişin qismində olmaq heç də xoş deyil . Üstəlik oturacaqların sayı artırıldığından onsuz da kiçik olan avtobuslarda sərnişinlər günün pik saatlarında əziyyətlə yol getməyə məcbur qalırlar.

Ekspertlər problemin həllini məqsədyönlü tədbirlərin aparılmasında görür. Bəs, avtobus parkının yenilənməsi nə zaman gündəmdə olacaq? Məsələ barədə Azərbaycan Yürüstü Nəqliyyat Agentliyi ilə əlaqə saxladıq. Qurumdan bildirildi ki...

Haqlı iradlar, aidiyyatı qurumların vədləri və yaranan mənzərə göz qabağındadır. Ümid edirik yaxın zamanlarda rayonlarda da ictimai nəqliyyat şəbəkəsi yenilənər və sərnişinlər rahat şəkildə mənzil başına çatarlar.

Şəkidə gecə saatlarında İran vətəndaşının idarə etdiyi bitum daşıyan yük avtomobili aşıb. Hadisə Şəki-Qax magistralının Şəkinin İnçə kəndindən keçən hissəsində baş verib.

Hadisə nəticəsində avtomobildə olan maye yola dağılıb. Həmin istiqamətdə nəqliyyat vasitələrinin təhlükəsizliyini təmin etmək məqsədilə avtomobillərin hərəkətinə məhdudiyyət tətbiq edilib.

Hadisənin yük avtomobilinin əyləc sistemində yaranan problem nəticəsində baş verdiyi bildirilir. Xəsarət alan olmayıb.