Balakəndə narkotik vasitənin təsiri altında və sərxoş vəziyyətdə avtomobil idarə edən sürücülər məsuliyyətə cəlb olunublar. Dövlət Yol Polisi Bölməsinin əməkdaşlarının yol hərəkəti təhlükəsizliyinin təmin edilməsi məqsədilə keçirdiyi tədbir zamanı spirtli içki və narkotik vasitənin təsiri altında avtomobil idarə edən 15, sürücülük hüququ olmadan sükan arxasına əyləşən 10 nəfər müəyyən ediblər.

Onların barəsində qanunvericiliyə uyğun tədbirlər görülüb. Son bir ay ərzində isə Balakəndə yol hərəkəti qaydalarını kobud şəkildə pozan ümumilikdə 354 sürücü inzibati məsuliyyətə cəlb olunub.

Zaqatala şəhərinin girəcəyində illər öncə istifadəyə verilən piyada keçidi bu ərazidə tez-tez baş verən qəzaların qarşısının alınmasına hesablanıb. Ancaq piyadalar keçidlə yox, təhlükəli manevrlə avtomobillərin sıx hərəkət etdiyi yoldan keçirlər. Nəticədə isə təhlükə qaçılmaz olur.

Qanunla piyadalar özlərinin və digər yol iştirakçılarının təhlükəsizliyini təmin etməlidirlər. Qaydalara riayət etməyənlər barəsində isə İnzibati Xətalar Məcəlləsinin müvafiq bəndinə əsasən cərimələr nəzərdə tutulur.

Bəs piyadanın məsuliyyətsizliyi səbəbindən baş verən yol nəqliyyat hadisələri zamanı kim məsuliyyət daşıyır?! Bir sözlə, yol terrorundan sığortalanmaq üçün hər kəs öhdəlik və vəzifələrini bilməli, mütləq şəkildə əməl etməlidir.

Il Yeniyol, Tircan-ferma, Zərgəran, Pirəbilqasım kəndlərində yaşayan 51 məktəbli dərsə gedə bilmir. Oktyabr ayının 1-dən şagirdlərin daşınması üçün ayrılan nəqliyyat vasitəsi heç bir səbəb göstərilmədən xətdən çıxarılıb.

Dağlıq Şirvan Regional Təhsil İdarəsinin məsələyə münasibəti isə belə oldu... Bu proses yeni tədris ilində oktyabrın 1-dək davam edib və daşıyıcı şirkətlə müqaviləyə xitam verilib. Hazırda şagirdlərin daşınmasını həyata keçirmək üçün şirkətlərlə aparılan danışıqlar davam etdirilir. Prosesin yaxın günlərdə bərpa ediləcəyi nəzərdə tutulub.

Belə olan halda həmin şagirdlərin dərsi buraxdığı günlərin əvəz edilməsi məsələsi də ortaya çıxır. Ümid edirik, problem tezliklə aradan qalxar və məktəblilər dərslərinə qaldıqları yerdən davam edərlər.

Şəkidə tütün əkini sahələri əvvəlki illə müqayisədə 134 hektar artıb. Rayonda 800-dək fermer kənd təsərrüfatının ən gəlirli sahələrindən biri olan tütünçülüklə məşğul olur. Tütünçülük təsərrüfatlarında 2300-dən çox kənd sakininin məşğulluğu təmin olunur.

Son bir ildə 2 yeni qurutma məntəqəsi istifadəyə verilib. Bu da tütünçülükdə həm əl əməyinin yüngülləşməsinə həm də iqtisadi səmərələliyə gətirib çıxarıb.

Xatırladaq ki, rayonda fəaliyyət göstərən tütün istehsalı və emalı məntəqələrində, həmçinin şəxsi təsərrüfatlarda 327 ədəd tütünqurutma kamerası var.

Bu ildən məktəblərdə yeni layihəyə start verilib. Təhsil nazirliyinin qərarına əsasən artıq ölkə üzrə bir sıra seçilmiş təhsil ocaqları fərqli istiqamətdə çalışmağa balayıb. Belə ki, seçilmiş məktəblər təmayül tədris planları əsasında öz fəaliyyətini davam etdirəcək.

Məktəbdə tədris prosesi şagirdlərin maraqlarına və qabiliyyətlərinə uyğun olaraq təmayül tədris planları əsasında təşkil edilib. Bu tədris planları şagirdlərin dərinləşdirilmiş biliklərə yiyələnmələrinə və gələcəkdə ixtisas seçimi üçün daha yaxşı hazırlanmasına kömək edəcək. 6 nömrəli tam orta məktəbin bu layihə üçün seçilməsi heç də təsadüfi deyil. Məktəbdə təhsil alan aşağı sinif şagirdlərinin aqibətinə gəlincə...

Qurum rəsmisi məktəbdə təhsil almaq istəyən 10-cu sinif şagirdlərinin qəbul prosesinə də aydınlıq gətirib. Belə ki, qruplarda şagirdlərin sayı 15 nəfəri keçməməlidir. Bunun üçün bir sıra nüanslara diqqət verilir. Şəki-Zaqatala Regional Təhsil İdarəsindən onu da bildirdilər ki, yaxın gələcəkdə Şəkidə daha bir məktəbdə analoji layihə həyata keçiriləcək. Eyni zamanda bu layihə digər bölgə məktəblərini də əhatə edəcək.

Şamaxıdan 10 kilometr uzaqlıqda yerləşən, vaxtilə səsli-küylü, qonaq-qaralı, gözəl təbiətə malik olan Şamaxının Kərkənc kəndi indi sakitliyə qərq olub. Hazırda 40 ailənin , 300-ə yaxın sakinin yaşadığı kənddə əhali sayı artmaq əvəzinə azalmağa doğru gedir. Susuzluq,yolsuzluq və saymaqla bitməyən problemlər ucbatından sakinlərin bir çoxu evlərini boş, kimsəsiz qoyaraq başqa ərazilərə köç edirlər. Bu da yaşlı nəslin nümayəndələrini narahat edir. Baxımsız qalan evlərsə yararsız hala düşüb.

Kənd ərazisində su bulaqları olsa da hamısı quruyub. Sakinlər deyir ki, kəndə həftədə bir dəfə hər evə 120 litr su verilir, oda lilli, palçıqlı. Bilmirik o suyu özümüz istifadə edək yoxsa mal qaraya verək.

Kənddə problemlər bununla da yekunlaşmır. Ərazidə aptekin, marketin olmaması sakinlərin işini daha da çətinləşdirir.

Bütün bunlar azmış kimi kəndin bir tərəfi zibilliyə qərq olub. Ərazidə antisanitar vəziyyət hökm sürür. Sakinlər deyir ki, illərdir yaşadıqları çətinliklərlə bağlı bütün aidiyyatı qurumlara müraciət ediblər. Ancaq məhəl qoyan olmayıb. Bir müddət də davam etsə Kərkənc də tərk edilmiş kəndlərində siyahısında öz yerini alacaq.