Şəkinin Vərəzət kəndində yaşı iki min ilə yaxın olması etimal edilən qəbir aşkarlanıb. Aidiyyatı qrumlar araşdırmalar aparır. Qəbrin ənənəvi formadan fərqli, yəni daş qutu şəklində olması onun diqqətini çəkib. Təbriz Əliyev dərhal qazıntını dayandıraraq aidiyyatı orqanların məsələni araşdırması üçün məlumat verib. Məhkəmə Tibbi Ekspertiza və Pataloji Anatomiya Birliyinin Şəki rayon Şöbəsindən əraziyə ekspertlər gələrək qazıntı zamanı aşkar edilmiş insan sümüklərinin bir hissəsini götürərək ekspertiza olunması üçün aparıblar. Şəki Elmi Mərkəzinin əməkdaşı qəbrə baxış keçirərək onun daş qutu şəklində olması, yerləşmə istiqaməti , qəbirdə mərhuma aid əşyaların olmaması və sairə dəlillərə görə onun təxminən iki min ilə qədər yaşı ola biləcəyinin etimal olnmasını bildirib. Onun fikrinə görə ərazidə qazıntı işi aparılaraq tam nəticəyə gəlmək lazımdı. Faktla bağlı Şəki Rayon Prokurorluğunda araşdırma aparılır.

Zaqatala rayonunda Azərbaycan hökuməti tərəfindən maliyyələşdirilən BMT-nin Ərzaq və Kənd Təsərrüfatı Təşkilatı (FAO) - Azərbaycan Tərəfdaşlıq Proqramına daxil olan və Avropa İttifaqı tərəfindən maliyyələşdirilən layihələrin iştirakı ilə kənd təsərrüfatı məhsullarının yarmarkası baş tutub. "Kənd Boğçası" fermer yarmarkasında qida qəhrəmanlarının məhsul və işləri təqdim olunaraq yerli qida məhsulları, qida təhlükəsizliyi və sağlam qidalanmanın əhəmiyyəti iştirakçıların diqqətinə çatdırılıb. Tədbirə qatılan qonaqlar xüsusi məhsullarla tanış olub, yerli aşpazların hazırladığı təamlardan dada və kiçik fermer təsərrüfatı sahiblərinə dəstək ola biliblər.  Fermer yarmarkasının məqsədi yerli qida və kənd təsərrüfatı məhsullarınıtəqdim edərək potensial alıcı və istehlakçıları həmin məhsullara cəlb etmək, heç kəsi kənarda qoymadan daha yaxşı istehsal, daha yaxşı qidalanma və daha yaxşı həyat üçün inklüziv və dayanıqlı aqro-ərzaq sistemlərinin yaradılmasıdır.  Kənd əhalisinin gəlirlərini və dolanışıq vəziyyətini yaxşılaşdırmaq və dəyər zənciri yanaşması ilə kiçik sahibkarlıq müəssisələrinin dəstəklənməsi yarmarkanın əsas hədəflərindən biridir.

Azərbaycanda "İçərişəhər" Dövlət Tarix-Memarlıq Qoruğu İdarəsi, Bakı Şəhər İcra Hakimiyyəti, Azərbaycan Respublikası Mədəniyyət Nazirliyi və Azərbaycan Respublikası Təhsil və Elm Nazirliyini təşkilatçılığı ilə Milli Qurama Festivalına start verilib. Layihənin həyata keçirilməsində əsas məqsəd XX əsrin əvvəllərinə qədər geniş istifadə olunan, lakin keçən zaman ərzində bəzi ənənəvi sənət növləri kimi unudulmaq təhlükəsi yaşayan "Qurama" sənətinə yeni həyatın verilməsidir. Festival çərçivəsində 19 avqust 2022-ci il tarixində Azərbaycanımızın qədim sənətkarlıq şəhərlərindən olan Şamaxıda rayon icra hakimiyyətinin və "İçərişəhər" Dövlət Tarix-Memarlıq Qoruğu İdarəsinin təşkilatçılığı ilə tədbir keçirilib. Tədbirdə qədim sənət növü olan quramanın yaşadılmasında və gələcək nəsillərə ötürülməsində bu kimi tədbirlərin əhəmiyyətini vurğulanıb. Çıxışlarda “Qurama” sənətinin tarixi, onun milli adət-ənənələrimizdəki rolundan geniş söhbət açılıb, festval çərçivəsində görülmüş işlərdən danışılıb. Sonra tədbir iştirakçıları “Qurama” sənətinə həsr olunmuş sərgiyə baxış keçirib, tədbir çərçivəsində təşkil olunmuş usta dərslərində iştirak ediblər.

Şəkinin Kiş kəndi yaxınlığında meşə ərazisindəki yanğın hadisəsi baş verib.  Yanğın mürəkkəb relyefli dağlıq ərazidə baş verdiyindən texnikanın əraziyə cəlb edilməsində çətinliklər yaranıb. Yanğının söndürülməsində əsasən əl əməyindən istifadə olunur. “Hazırda ETSN-in yerli qurumlarının 100-ə qədər əməkdaşı və FHN-in Dövlət Yanğından Mühafizə Xidmətinin nümayəndələri yanğının söndürülməsində iştirak edir”. Yanğınsöndürmə işlərini sürətləndirmək və daha geniş əraziyə yayılmasının qarşısını almaq məqsədilə, ərazinin mürəkkəb relyef xüsusiyyəti nəzərə alınaraq yanğınla mübarizə tədbirlərinə FHN-in Mülki müdafiə qoşunları, Şimal-qərb Regional Mərkəzinin müvafiq qüvvələri və Aviasiya dəstəsinin iki ədəd helikopteri cəlb olunub. Hazırda yanğınsöndürmə işləri davam etdirilir.