Dini Qurumlarla İş üzrə Dövlət Komitəsi və Alban-Udi Xristian dini icmasının birgə təşkilatçılığı ilə Qəbələnin Nic kəndində əsaslı bərpa edilən və Vətən Müharibəsi günlərində istifadəyə verilən Məryəm Ana kilsəsində ölkəmizdə fəaliyyət göstərən dini konfessiya nümayəndələrinin birgə iştirakı ilə ibadət edilib.

Bildirilib ki, müasir Azərbaycan təkcə mədəniyyətlərarası deyil, həm də dinlərarası dialoqun mərkəzidir. Bu mənada Qəbələnin Nic qəsəbəsi təkcə ölkəmizdə deyil dünyada tolerant mərkəzlərdən biri kimi tanınır. Qəsəbədə Azərbaycan Udi Ocağının yaradılması multikulturalizmin daha da inkişafı yolunda mühüm addım kimi qiymətləndirilir. Hazırda Nic qəsəbəsində 3 kilsə, iki məscid var. Nicdəki məktəblərin ibtidai siniflərində udin dili tədris olunur, kilsədə dini ayinlər onların ana dilində icra edilir.

İbadət mərasimindən əvvəl dini konfenssiya nümayəndələrinə Məryəm Ana kilsəsi barədə məlumat verilib. Onun bərpa müddətində həyata keçirilən işlərdən danışılıb. Daha sonra kilsənin daxilində şamlar yandırılıb, birgə yaşayış mövzusunda sərgiyə baxış keçirilib. Ölkəmizdə fəaliyyət göstərən müxtəlif dinlərin nümayəndələri öz ana dillərində ölkəmizin birlik və bərabərliyi üçün dua edib, şəhidlərin xatirəsini hörmətlə anıb, qazilərə şəfa diləyib.