Ətrafdakı 5 böyük küçə və bütün küçələri birləşdirən ara yollar abadlaşdırılıb, asfalt çəkilib ancaq cəmi 40 metr uzunluğunda olan iki küçənin kəsişməsi nədənsə asfaltsız qalıb. Söhbət Zaqatalanın Yeni yaşayış Massivindəki küçədən gedir... 40 metrlik ərazi hər nə qədər kiçik görünsə də Zaqatalanın Nazim Hikmət və Mikayıl Müşfiq küçələrini birləşdirən ara yoldan hər gün yüzlərlə sakin istifadə edir. Üstəlik küçələrin kəsişdiyi ərazidə körpələr evi və uşaq bağçası fəaliyyət göstərdiyi üçün bu problem təkcə küçə sakinlərini əhatə etmir. Bir neçə il öncə Yeni yaşayış Massivindəki btün küçələr tam asfaltlaşdırılsa da nədənsə sözügedən əraziyə asfalt tökülməyib. Quru havalarda toz, yağışlı havalarda isə yolun palçıqlı olması, üstəlik qurunt və yağış sularının yaxınlıqdakı həyətlərə dolması sakinlərin narazılığına səbəb olur. Onların tək arzusu cəmi 40 metrlik bu ara küçənin də digər ərazilər kimi asfaltlanmasıdır. Rayon İcra Hakimiyyətindən isə bildirildi ki,yolların asfaltlanması öncədən təyin edilmiş layihə smetasına uyğun olaraq növbəlilik əsasında həyata keçirilir. Nazim Hikmət və Mikayıl Müşfiq küçələrini birləşdirən ara yolun da digər məhəllə daxili yollarla birgə gələn ilin layihə smetasına salınaraq, abadlaşdırılması nəzərdə tutulub.

Qaxda minik avtomobili radar quraşdırılan dirəyə çırpılıb. Hadisə gecə saatlarında Qax-Şəki avtomobil yolunun Qax rayonu ərazisindən keçən hissəsində baş verib. Şəki istiqamətində hərəkət edən Tərtər rayon sakininin idarə etdiyi “VAZ 21099” markalı minik avtomobili idarəetmədən çıxaraq yolun kənarında radar quraşdırılmış dəmir dirəyə çırpılıb. Qəza zamanı avtomobildə olan sərnişin - Tərtər rayon sakini 34 yaşlı Rəqsanə Həsənova aldığı ağır bədən xəsarətləri ilə Qax Rayon Mərkəzi Xəstəxanasının Reanimasiya şöbəsinə yerləşdirilib. Onun vəziyyəti ağır qiymətləndirilir. Məlumata görə, qəzaya düşən avtomobil Balakən rayonundan Tərtər rayonuna gedirmiş. Qəza baş verən zaman avtomobildə azyaşlılar da daxil 7 nəfər olub. Onların hamısı bir ailənin üzvləridir. Faktla bağlı araşdırma aparılır.