Zaqatalada əlində qumbara partlayan 18 yaşlı gənc ölüb. Hadisə günorta saatlarında rayonun Pərzivan adlanan ərazisində baş verib. Muxax kənd sakini Məhəmməd Ömərov ərazidən qumbara tapıb. O, tapdığı qumara ilə ehtiyatsız davrandığından əlində partlayıb.

Hadisə nəticəsində müxtəlif dərəcəli bədən xəsarətləri alan Məhəmməd Ömərov Zaqatala Rayon Mərkəzi Xəstəxanasına aparılarkən yolda dünyasını dəyişib.Faktla bağlı araşdırma aparılır.

Qaxda “Narkomaniya ümumbəşəri bəladır” mövzusunda tədbir keçirilib. 2 saylı məktəb liseydə rayon polis şöbəsinin təşkilatçılığı ilə keçirilən tədbirdə hüquq-mühafizə orqanı əməkdaşları, eləcə də təhsil ictimaiyyəti iştirak edib.

Çıxış edənlər narkotik vasitələrin səbəb olduğu fəsadlar və onun acı nəticələri barədə məlumat verib, ölkəmizdə narkomaniya əleyhinə aparılan mübarizənin hər zaman diqqət mərkəzində olduğunu vurğulayıblar. Diskussiya şəklində davam edən görüşdə “ağ ölüm”ə qarşı mübarizədə ictimaiyyətin birgə fəaliyyətinin zəruriliyi diqqətə çatdırılıb.

Sonda şagirdlərə narkomaniyanın acı nəticələrinnən bəhs edən film nümayiş olunub.

Şamaxıda Əməkdar incəsənət xadimi, şair Baba Vəziroğlunun 70 illik yubileyinə, həyat və yaradıcılığına həsr edilən şeir və mahnı müsabiqəsinin yekun mərhələsi keçirilib. Dağlıq Şirvan Regional Təhsil İdarəsinin təşəbbüsü, Rayon Uşaq-Gənclər İnkişaf Mərkəzlərinin təşkilatçılığı ilə elan edilmiş müsabiqənin yekun tədbirində şair Baba Vəziroğlu, eləcə də təhsil ictimaiyyəti iştirak edib. Şairin həyat və yaradıcılığından bəhs edilib.Vurğulanıb ki, Baba Vəziroğlunun poeziyasında Vətənə, xalqa, torpağa bağlılıq, sevgi üstünlük təşkil edir. Müsabiqəyə 7-11-ci sinif şagirdləri qatılıb. Birinci mərhələdə İsmayıllı, Şamaxı, Ağsu və Qobustan rayonları üzrə Uşaq-Gənclər İnkişaf Mərkəzlərində yaradılan müvafiq komissiya tərəfindən şagirdlərin bilikləri qiymətləndirilib. Hər rayon üzrə seçilən 3 şagird final mərhələsində iştirak hüququ qazanıb. Finalda isə 4 nəfər I, 4 nəfər II, daha 4 nəfər isə III yerə layiq görülüb. Qalib şagirdlər, eləcə də müsabiqədə fəallıq göstərənlər mükafatlandırılıb. Tədbirin sonunda Şamaxı rayon ümumtəhsil məktəblərində təhsil alan şagirdlərin ifasında Baba Vəziroğlunun şeir və mahnıları səsləndirilib.