İqtisadiyyat Nazirliyi yanında Əmlak Məsələləri Dövlət Xidməti torpaq idarəçiliyi sahəsində münasibətlərin tənzimlənməsi üçün İsmayıllıda torpaq və əmlak idarəçiliyinə həsr edilən zona müşavirəsi keçirib. Müşavirədə İsmayıllı, Qəbələ və Oğuz rayonlarının yerli icra hakimiyyəti orqanlarının məsul əməkdaşları, bələdiyyələrin nümayəndələri iştirak ediblər. Tədbirdə İsmayıllı rayonu üzrə torpaqların elektron kadastr uçotu işləri elektron olaraq nümayiş olunub. Qeyd edilib ki, İsmayıllı, Qəbələ və Oğuz rayonları üzrə ümumilikdə 240 120 hektar ərazidə torpaq və üzərindəki daşınmaz əmlaklar barəsində müfəssəl kadastr məlumat bazası yaradılıb. Müşavirədə məlumat verilib ki, adları qeyd olunan rayonlar üzrə ümumilikdə 112 inzibati ərazi dairəsindən 98-nin xəritələri hazırlanaraq Milli Məclisinə təhvil verilib, 14 inzibati ərazi dairəsinin xəritələri isə Ekologiya və Təbii Sərvətlər Nazirliyi ilə razılaşdırılma mərhələsindədir. Çıxış edən bələdiyyə sədrləri torpaq və əmlak idarəçiliyi sahəsində rastlaşdıqları çətinliklərdən, mövcud vəziyyətdən bəhs ediblər. Sonda iştirakçıları maraqlandıran suallar cavablandırılıb, təkliflər dinlənilib.

Şəki Dövlət Dram Teatrında gənc rejissor Orxan Həmidlinin quruluşunda Xəqani Əliyevin “Çələbi xana Qızılqaya xəyanəti” adlı tarixi dramı əsasında səhnələşdirilmiş “Çələbi xan” tamaşasına geniş ictimai baxış keçirilib. Tamaşa görkəmli tarixçi alim, akademik Yaqub Mahmudovun 80 illik yubileyinə həsr olunub.

Tamaşanın quruluşçu rəssamı Sahib Əhmədov, bəstəkarı Xalq artisti Sərdar Fərəcov, geyim üzrə rəssamı Günel Məmmədlidir. Rəqslərin quruluşu Çingiz Novruzəliyevə məxsusdur. Rəngarəng tarixi obrazların yer aldığı tamaşada Əməkdar artistlər Rəhim Qocayev, Akif Yusifov, aktyorlar Aydın Əlibabayev, Lalə Məmməd, İlkin Rüstəmov, Rəşid Mirizadə, Rəşad Rüstəmov, Qurban Rəsulov, Çingiz Novruzəliyev, Fərahim Fətəliyev, Pərviz İsmayılov, Orxan Həmidli, Elvin Mabudov və Rəsul Məmmədrəhimov rol alıblar. Səhnə əsəri tamaşaçılar tərəfindən alqışlarla qarşılanıb. 

Bu gün Sosial Şəbəkələrdə Zaqatalada itlərin öldürülməsi ilə bağlı kadrlar yayılıb. Görüntülər haqlı olaraq insanların narazılığına səbəb olub. Faktla bağlı aidiyyatı qurumlar da hərəkətə keçib.

Zaqatala rayonunda sahibsiz itlərin güllələnməsi iddia edilib. Bu barədə sosial şəbəkələrdə videogörüntülər yayılıb. Belə ki, rayon ərazisində lentə alınan videoda bir neçə it cəsədinin aşkarlandığı görünür. Güllələnmiş itlərin naməlum istiqamətdə daşındığını görən sakinlər və qarşı tərəf arasında insident yaşanıb. RPŞ də baş vermiş hadisəylə bağlı araşdırmalara başlanılıb.

Heyvanlara qarşı bu cür sərt tədbirlərin görülməsi digər sakinlər tərəfindən də xoş qarşılanmayıb. Küçə itlərinin sayının artması və quduzluğa yoluxduğu ehtimal edilən itlərin insanlar üçün təhlükə yaratması bir çox rayonlarda, eləcə də Zaqatalada problemə çevrilib. Mütəxəssislər problemin həlli üçün müəyyən addımların atılması, xüsusi sığınacaqların yaradılması və itlərin qısırlaşdırılmasını vacib sayır. 

Şəkinin Baltalı kəndində yanğın hadisəsi baş verib. Kənd sakini Zahir Mənəfova məxsus ümumi sahəsi 100 m² olan tövlənin dam örtüyünün yanar konstruksiyaları 30 m² sahədə və dama yığılan 1 ton ot bağlamasının bir qismi yanıb. Yanğın söndürülüb, tövlənin və ot bağlamalarının qalan hissəsi yanğından mühafizə olunub. İlkin ehtimala görə yanğın elektrik naqillərində baş verən qısaqapanma nəticəsində baş verib.

Səfir rayon icra hakimiyyətinin başçısı ilə görüşüb. Görüş zamanı səfirə rayonun iqtisadi göstəriciləri, sosial və mədəni həyatı, rayonda yaradılan yeni istehsal müəssisələri, sənaye və turizm obyektləri barədə ətraflı məlumat verilib. Ardınca Qəbələ rayon Mədəniyyət Mərkəzində İndoneziyanın Azərbaycandakı Səfirliyi tərəfindən tədbir təşkil edilib.Tədbirdə səfir Hildi Hamid, Qəbələ Rayon İcra Hakimiyyətinin, rayonun idarə və təşkilatlarının, eləcə də rayon ictimaiyyətinin nümayəndələri iştirak edib. Öncə İndoneziya Respublikasının məhsullarından ibarət sərgiyə baxış keçirilib, tədbiri açıq elan edən RİH- başçısının müavini tədbirin Ümummilli Lider Heydər Əliyevin anadan olmasının 100 illiyinə və Azərbaycan Respublikası ilə İndoneziya Respublikası arasında imzalanmış diplomatik əlaqələrin 31-ci ildönümünə həsr edildiyini qeyd etmiş və belə möhtəşəm tədbirin keçirilməsi üçün Qəbələnin seçildiyinə görə cənab səfirə minnətdarlığını bildirib. Çıxış edən səfir Hildi Hamid İndoneziya Respublikasının mədəniyyəti barədə məlumat verib və tədbirin keçirilməsi üçün yaradılan şəraitə görə rayon rəhbərliyinə təşəkkür bildirib. Sonda İndoneziya Respublikasının incəsənət kollektivlərinin iştirakı ilə milli musiqi və rəqslərdən ibarət konsert proqramı təqdim edilib.