Həftə içi 5 gün səhər saat 09:00-dan 11:00-a kimi Kanal S-də "Xəbərin var?" adlı verilişin aparıcıları İsa Şükürov və Elyar Sadiqovdur.

Şəhər ərazisində bir neçə obyektin, o cümlədən beşmərtəbəli binanın dam örtüyünə ziyan dəyib, ağacların iri budaqları qırılıb. 120 şagird yerlik Ağçay kənd ümumi orta məktəbinin isə dam örtüyü sıradan çıxıb. Hadisə dərs zamanı baş verdiyindən şagirdlər arasında təşviş yaşanıb. Xoşbəxtlikdən xəsarət alan olmayıb. Məktəbdə tədris prosesi dayandırılıb.

Həmçinin, güclü külək nəticəsində Qaxın Qaxbaş kənd və Qəbələnin Dızaxlı kənd uşaq bağçası, Şəkinin Bideyiz kənd tam orta məktəbinin dam örtüyü müəyyən dərəcədə zədələnib, Balakənin Qabaqçöl qəsəbə tam orta məktəbinin pəncərələri sınıb. Təhsil müəssisələrində ilkin təhlükəsizlik tədbirləri görülüb. Tezliklə bərpa işlərinə başlanacaq. Bölgədə isə küləkli hava şəraiti davam edir...

Fövqəladə Hallar Nazirliyi tərəfindən həyata keçirilən maarifləndirmə tədbirlərinə baxmayaraq hələ də bəzi hallarda sadə təhlükəsizlik qaydalarına etinasız münasibətə rast gəlinir. Bu da bayram tədbirlərinin faciəvi sonluqla bitməsinə səbəb ola bilər. Fövqəladə Hallar Nazirliyi xoşagəlməz hadisələrdən qorunmaq üçün bir sıra təhlükəsizlik qaydalarına əməl olunmağın vacibliyinə diqqət çəkir. Vətəndaşlar da yarana biləcək təhlükənin baş verməməsi üçün məsuliyyətli davranmalıdırlar. Həmçinin, qanunvericiliyə əsasən, mülkiyyət formasından asılı olmayaraq tədbir keçirilən bütün obyekt və müəssisələrin rəhbərləri yanğın təhlükəsizliyinin təmin edilməsinə cavabdehlik daşıyır. Odur ki, yanğın təhlükəsizliyi tələblərini müvafiq qaydada təmin etmək və tədbirlərin keçirilməsini Fövqəladə Hallar Nazirliyinin Dövlət Yanğın Nəzarəti Xidməti ilə razılaşdırmaq tələb olunur. Unutmayaq qaydalara biganəlik həyatımıza təhlükədir.

Səhər saatlarından başlayaraq rayon ərazisində hökm sürən küləkli hava şəraiti nəticəsində şəhərin Heydər Əliyev prospektində iri gövdəli şam ağacı aşıb. Hadisə baş verən zaman yolla piyada hərəkət edən 30 yaşlı Abbas Neftullayev yüngül xəsarət alıb. Abbas Neftullayevə hadisə yerinə cəlb edilən Təcili Tibbi Yardım həkim briqadasının əməkdaşları tibbi yardım göstərib. Güclü külək səbəbindən yıxılan ağac yaxınlıqdakı yaşayış evinə də qismən ziyan verib. Zaqatala şəhəri istiqamətində maşınların hərəkətində müvəqqəti fasilə yaranıb. Yol təmizləndikdən sonra avtomobillərin hərəkəti yenidən barpa edilib. Qeyd edək ki, şimal-qərb bölgəsində küləkli hava şəraiti davam edir.

Şəkidə torpaqlarımızın azadlığı uğrunda canlarından keçən şəhidlərin əziz xatirəsinə həsr olunan "Vətən məcnunları" kitabının təqdimatı keçirilib. Şəki Tibb kolleci və 1 saylı Mediasiya təşkilatının birgə keçirdiyi tədbirdə şəhid ailələri, tibb kollecinin tələbələri və şəhər ictimaiyyəti iştirak edib. İlk öncə şəhidlərin əziz xatirəsi yad edilib. Ardınca Vətən müharibəsinə həsr olunan videoçarx izlənilib. Çıxış edənlər bildirib ki, Azərbaycan Yazıçılar birliyinin üzvü Şəfa Vəlinin redaktorluğu ilə nəşr olunan kitabda ruhları göylərdə, cismləri torpaqda, adları milyonların qəlbində yaşayan şəhidlərimizin həyat yoluna işıq tutulur. Qeyd olunub ki, kollecin gənc tələbələrinin qələmə aldığı toplu vətən aşiqləri olan qəhrəman oğulların şücaəti, rəşadəti, vətənpərvərliyinə yazdıqları tarixə şahidlik edir, onları bizə daha yaxından tanıdır. Rəsmi hissədən sonra şəhid ailələrinə "vətən məcnunları" kitabı və fəxri fərmanlar təqdim edilib.

Dağlıq Şirvan Regional Təhsil İdarəsində bölgə üzrə müxtəlif olimpiada, fənn müsabiqələri qaliblərinin, həmçinin döş nişanı almış müəllimlərin mükafatlandırılması mərasimi keçirilib. Tədbirdə Dağlıq Şirvan Regional Təhsil İdarəsinin, Yeni Azərbaycan Partiyası Rayon Təşkilatının rəsmiləri, təhsil işçiləri və şagirdlər iştirak ediblər. Çıxış edənlər Ulu Öndərin Vətən və xalq qarşısındakı xidmətlərindən, təhsil sahəsinin inkişafına göstərdiyi diqqət və qayğıdan danışıblar. Bildirilib ki, 2023-cü il Dağlıq Şirvan bölgəsinin təhsil həyatı üçün çox uğurlu olub. Regional Təhsil İdarəsinin əhatə etdiyi ümumitəhsil məktəblərində təhsil alan şagirdlər il ərzində bir sıra olimpiada, müsabiqə və festivallarda fəal iştirak edib, onların bir çoxu bu yarışların qalibi olub.Ardınca mükafatlandırma tədbirində Regional İdarənin tabeliyində olan Şamaxı, İsmayıllı, Ağsu və Qobustan rayonlarında yerləşən təhsil müəssisələrində çalışan və beynəlxalq müəllimlər günü münasibətilə Qabaqcıl döş nişanı və Fəxri fərmanla təltif edilən təhsil işçilərinə medallar və Fəxri Fərmanlar təqdim edilib. Həmçinin Təhsil İnstitutu tərəfindən keçirilən Lütfizadə adına məntiq olimpiadası və Fənn müsabiqələrində iştirak edərək medal qazanan şagirlərədə medal və diplomlar təqdim edilib. İl ərzində təhsil sahəsində fərqlənən bir qrup təhsil işçisi və şagirdə isə Təşəkkürnamə təqdim edili. Tədbir şagirdlərin ifasında ədəbi-bədii kompozisiya ilə davam edib.

Şəki Şəhər-Rayon Polis Şöbəsinin əməkdaşları tərəfindən sakinlərin istirahətinə maneə yaradan partlayıcı və tezalışan maddələrin, pirotexniki vasitələrin satışının qarşısının alınması istiqamətində tədbirlər keçirilib. Daxili İşlər Nazirliyinin mətbuat xidmətinin Şəki regional qrupundan verilən məlumata görə, rayon ərazisində keçirilən tədbirlər zamanı əvvəlcədən edilən xəbərdarlıqlara baxmayaraq bir neçə mağazada pirotexniki vasitələrin gizli şəkildə satışını təşkil edən şəxslər müəyyən edilib. Həmin şəxslərin fəaliyyət göstərdiyi obyektlərə baxış keçirilərkən pirotexniki vasitələr, partlayıcı və tezalışan maddələr aşkar olunaraq götürülüb. Faktlarla bağlı onların barəsində İnzibati Xətalar Məcəlləsinin müvafiq maddəsi ilə protokol tərtib edilərək baxılması üçün rayon məhkəməsinə göndərilib.

MSK-nın təşkilatçılığı ilə regional seminar təşkil olunub Fevralın 7-də keçiriləcək növbədənkənar prezident seçkilərinin yüksək səviyyədə, azad, ədalətli və şəffaf təşkili məqsədilə Mərkəzi Seçki Komissiyası paytaxtla yanaşı, regionlarda da tədbirlər keçirir. Mərkəzi Seçki Komissiyasının Hüquq və İnsan Haqları İnstitutu ilə birgə layihəsi çərçivəsində “Seçki hüququ ilə bağlı müraciətlərə baxılmasına həsr edilən” növbəti regional seminar Şəkidə təşkil olunub. Tədbirdə Hüquq və İnsan haqları üzrə mütəxəssislər, eləcə də İsmayılı, Qəbələ, Oğuz, Şəki, Qax, Zaqatala və Balakən rayonları üzrə dairə seçki komissiyalarının ekspert qruplarının üzvləri iştirak ediblər. Tədbirdə seçki hüquqlarının pozulması halında qanunvericiliyin tələbləri, müraciət və şikayətlərin araşdırılması, azad seçki hüququ və digər mövzulu çıxışlar edilib. Həmçinin iştirakçılara əyani vəsaitlərdən istifadə etməklə mövzular barədə ətraflı məlumat verilib. Tədbirin praktiki hissəsi başa çatandan sonra MSK nümayəndələri seçki qanunvericiliyi və ekspert fəaliyyəti ilə bağlı məşğələlər keçib, dairə seçki komissiyaların üzvləri sınaq testlərinə cəlb olunub. Həmçinin ilk dəfə ekspert qrupunun üzvləri üçün hazırlanan, onlara yardımçı olacaq yeni yaddaş kitabçaları paylanılıb.