Şamaxıda narkotik vasitənin təsiri altında qəza törədən sürücü həbs olunub. Qobustan sakini Rövşən Quliyev idarə etdiyi “VAZ-2114” markalı avtomobillə Şamaxı şəhərində yol nəqliyyat hadisəsi törədib. Sürücü müvafiq tibbi müayinədən keçirildikdən sonra onun narkotik vasitədən istifadə etdiyi müəyyən olunub. Quliyev barəsində toplanan material hüquqi qiymət verilməsi üçün rayon məhkəməsinə göndərilib. Məhkəmənin də qərarı ilə həmin şəxs nəqliyyat vasitəsini idarə etmək hüququ 2 il müddətinə məhdudlaşdırılmaqla bir ay inzibati qaydada həbs olunub.

Qaxda keçirilən voleybol üzrə region birinciliyində qaliblər müəyyənləşib. Yarışda 6 rayon üzrə 8 komanda mübarizə aparıb. Gərgin mübarizənin sonunda Şəki şəhər 8 nömrəli tam orta məktəbin qızlardan ibarət voleybol komandası 1-ci yerə çıxaraq qızıl medala yiyələnib.

Zaqatalada növbəti dəfə dönərdən zəhərlənmə hadisəsi baş verib. 3 nəfərin zəhərləndiyi dönərxananın fəaliyyəti məhdudlaşdırılıb. Bəs, ard-arda baş verən bu zəhərlənmələrin səbəbləri nələrdir? Dönər satışı ilə məşğul olan şəxslər nələrə diqqət etməlidirlər və ya etmirlər? Sualların cavabı sujetdə...

Son günlər yağan yağışlar səbəbindən sürüşmə zonaları aktivləşib. Şamaxıda 4 il əvvəl çəkilən Çuxuryurd-Sis-Qaleybuğurd-Keçməddin-Qaladərəsi avtomobil yolunda yenidən təhlükəli vəziyyət yaranıb. Uzun illər yeni yol arzusunda olan sakinlərin sevinci uzun çəkməyib. Onlar yeni yolun qısa vaxt ərzində yararsız vəziyyətə düşəcəyindən narahatdırlar.

Şamaxının bir çox küçələrində yollar asfaltlanıb və kanalizasiya şəbəkəsi qurulub. Amma elə küçələr var ki, orada hələ də nə asfalt var, nə də kanalizasiya sistemi. Bu problemlər həmin küçələrin sakinlərinə ciddi narahatlıqlar yaradır.