Vətən müharibəsində şəhidlik zirvəsinə yüksələn Elgün Quliyevin doğulduğu Göylər kəndində xatirəsi anılıb. Çıxışlarda Vətən uğrunda canını fəda edən oğullarımızın döyüşlərdə göstərdiyi qəhrəmanlıqların hər kəs üçün örnək olduğu, şəhidlərimizin daim qəlblərdə yaşayacağı vurğulanıb.

Qeyd edək ki, arzusu tarixçi olmaq, Azərbaycanın şanlı tarixini tədris etmək olan Elgün şagirdlərinə tarixi öyrədə bilməsə də, səngərdə öz qanı ilə tarix yazıb. O, Füzuli, Xocavənd, Şuşa uğrunda gedən döyüşlərdə qəhrəmancasına vuruşub. Ölümündən sonra "Vətən uğrunda"," Füzulinin azad olunmasına görə", "Şuşanın azad olunmasına görə", "Döyüşdə fərqlənməyə görə" medalları ilə təltif olunub.

Qəbələdə ölümlə nəticələnən yol nəqliyyat hadisəsi baş verib. Hadisə rayonunun Nohurqışlar kəndi ərazisində meydana gəlib. “Mercedes” və “VAZ-2107” markalı avtomobillər toqquşub.

Nəticədə “VAZ”-ın sürücüsü, 60 yaşlı Ağamalı Xanalıyev aldığı xəsarətlərdən ölüb, “Mercedes”-in sürücüsü, 30 yaşlı Elgün Məmmədzadə və iki sərnişini xəsarət alıb. Faktla bağlı cinayət işi başlanılıb, araşdırmalar aparılır.

Şəkidə Molla Pənah Vaqif adına 7 nömrəli kitabxanada dahi söz ustadı Aşıq Ələsgərə həsr olunmuş tədbir keçirilib. Tədbirdə yazıçılar, şairlər, aşıqlar və mədəniyyət işçiləri iştirak edib. Çıxış edənlər Azərbaycan aşıq poeziyasını zirvələrə yüksəltmiş el sənətkarı haqqında geniş məlumat verib, onun aşıq şeir sənətinin tükənməz söz xəzinəsi olduğu qeyd edilib.

Ardınca Aşıq Ələsgərin həyat və yaradıcılığından bəhs edən videoçarx nümayiş olunub. Sonda tədbir söz ustadı Aşıq Ələsgərin ədəbiyyatımızda iz qoyan şeirlərinin səslənməsi, aşıqların ifaları ilə davam edib.