Qışı sərt keçən Şəkinin Bolludərə və Qaratorpaq sakinləri illərdir qazlaşma prosesindən kənarda qalıb. Şəki şəhərindən 75 km aralıda yerləşən 900 nəfərin yaşadığı bu kəndlərin əhalisi yanacaq kimi əsasən fındıq qabığı, məişət tullantıları və ya həyətlərindəki ağaclardan istifadə edir. Sakinlər deyir ki, aidiyyatı qurumlara dəfələrlə müraciət etsələr də bir nəticəsi olmayıb. Hələ 2021-ci ildə kəndlərin qazlaşacağı vədi verilsə də, Bolludərə kəndinin girişinə qədər gələn qaz kəmərinin çəkilməsi bilinməyən səbəbdən dayandırılıb."Azəriqaz"dan isə məsələ ilə bağlı bildirildi ki, qurum regionlarda qazlaşdırma prosesini mərhələli şəkildə həyata keçirir. O ki, qaldı bu il ərzində plana daxil edilən ərazilərə - 2024-cü ildə Şəkinin Aran, Şin, Zunud kəndləri, Baş Zəyzid kəndinin genişləndirilmiş hissəsi, eləcə də Şəki şəhərinin 18-ci, 19-cu, 20-ci, 21-ci kvartallarının qazlaşdırılması nəzərdə tutulur. Bolludərə və Qaratorpaq sakinləri isə bir il sonra mavi yanacağa qovuşacaqlar.

Azərbaycanda ilk dəfə olaraq "Türk Dünyası Təhsil sərgisi" keçirilir. Bakıda baş tutan tədbirdə türk dünyasının ən məşhur universitetlərinin nümayəndələri iştirak edirlər. Sərginin keçirilməsində məqsəd türk dilli ölkələri bir araya toplamaq, ikili əməkdaşlıqları təkmilləşdirmək , həmçinin ölkələrarası əlaqələrin daha da genişləndirilməsinə nail olmaqdır. Sərgidə Türkiyə, Özbəkistan, Kipr və Azərbaycan universitetləri və təhsil mərkəzləri iştirak edir. Burada universitet haqqında məlumat, qəbul şərtləri, təqaüd imkanları və daha bir çox məlumatı əldə etmək üçün şərait yaradılıb. Eyni zamanda sərgiyə qatılan şirkət və universitetlər də özləri haqda məlumatları təqdim edib. Sərginin növbəti mərhələsi isə sabah Gəncədə baş tutacaq. Bu sərgiyə Gəncədə yerləşən universitetlər də qatılacaq. Sərginin təşkilatçılar digər bölgələrdə də, bu tədbirin keçirilməsinin nəzərdə tutulduğunu və bölgədəki tələbə olmaq arzusunda olanlar üçün də eyni fürsəti yaradacaqlarını bildiriblər. Qeyd edək ki, Türk dünyası təhsil sərgisi ilk olaraq Azərbaycanda start götürüb və il ərzində digər Türk dövlətlərində də keçirilməsi planlaşdırılır.

Hadisə rayonun Yuxarı Tala kəndində, Hacımusa Aslanova məxsus ümumi sahəsi 96 kv/m olan sexlərdə baş verib. Yanğının söndürülməsi üçün əraziyə Fövqaladə Hallar Nazirliyinin Zaqatala rayon Dövlət Yanğından Mühafizə Hissəsinin yanğınsöndürən maşınları və şəxsi heyəti cəlb edilib. Yanğın nəticəsində dəmirçi sexində təmir üçün gətirilmiş “VAZ 21011” markalı avtomobil və sexin tavan hissəsi yanıb. Həmçinin sexə bitişik iki avtomobil hissələri satışı mağazasının tavanı yararsız hala düşüb, ehtiyat hissələrinə ziyanlıq dəyib. Digər tikililər yanğından mühafizə olunub.

Fövqəladə Hallar Nazirliyinin təşkilatçılığı, Azərbaycan Könüllü Təşkilatları İttifaqının tərəfdaşlığı ilə Şamaxı Olimpiya Mərkəzində könüllülərin təlim düşərgəsinin açılış mərasimi olub. Düşərgə, ümumilikdə, 3 gecə, 4 gün davam edəcək. Düşərgədə könüllülük fəaliyyəti haqqında ümumi məlumatlar, fövqəladə hallar zamanı davranış qaydaları paylaşılacaq, komanda oyunları və stresli şəraitdə fəaliyyətlər haqqında təlimlər keçiriləcək.Eyni zamanda, könüllülər fövqəladə hallar zamanı istifadə olunacaq texnikalarla yaxından tanış olacaq, istifadə qaydalarını mənimsəyəcəklər. Bununla yanaşı, təbii fəlakətlərdə insanlara humanitar yardımların göstərilməsi, çadırların qurulması, mülki müdafiənin təmin olunması ilə bağlı da təlimlər keçiriləcək. Düşərgədə 42 könüllü iştirak edir.