Novruz bayramı Qax rayonunda da böyük ruh yüksəkliyi ilə qeyd edilib. Baharın gəlişi münasibətilə “İçəribazar” Turizm Mədəniyyət Mərkəzində ümumrayon bayram şənliyi keçirilib. Bayram tədbiri Novruz tonqalının alovlandırılması ilə başlayıb. Tonqalı Vətən müharibəsi şəhidi Fərid Dursunovun övladı alovlandırıb. Dədə Qorqud və Bahar qızı şənlik iştirakçılarını qədim adət-ənənələrimizdən olan Novruz bayramı münasibətilə təbrik edib, xalqımıza bahar təravətli günlər arzulayıblar. Sonra tədbir iştirakçıları xalqımızın qədim adət-ənənələrini özündə əks etdirən sərgilərə, guşələrə baxıb, el sənətkarlarının əl işləri və milli mətbəx nümunələri ilə tanış olublar. Çıxışlarda milli-mənəvi dəyərlərimizin, qədim adət-ənənələrimizin qorunub saxlanılmasının vacibliyi vurğulanıb. Bayram şənliyi rayonun bədii özfəaliyyət, rəqs və folklor kollektivlərinin hazırladıqları maraqlı konsert proqramı ilə davam edib.Novruzun personajları olan Kosa və Keçəl şənlik boyunca məzəli oyunları, dadlı və duzlu zarafatları ilə hamıya xoş əhval-ruhiyyə bəxş ediblər.

Şəki Dövlət Yol Polisi Bölməsi hərəkət iştirakçılarına müraciət ünvanlayıb. Bildirilib ki, bayram günlərində Şəki Dövlət Yol Polis Bölməsi gücləndirilmiş iş rejimində işləyəcək.

Şəki şəhər 4 nömrəli uşaq musiqi məktəbində “Yaşıl dünya naminə həmrəylik ili” münasibətilə tədbir keçirilib. Əvvəlcə 2024-cü ilin “Yaşıl dünya naminə həmrəylik ili” elan olunmasının əhəmiyyətindən bəhs edilib. Bildirilib ki, bu gün Azərbaycan dünyada gedən iqlim dəyişikliyi proseslərinə ən həssas yanaşan azsaylı ölkələrdəndir. Daha sonra tədbir məktəbin şagirdləri tərəfindən hazırlanmış bir-birindən maraqlı musiqi çıxışları ilə davam edib. Tədbirin sonunda bir qrup şagird təşəkkürnamələrlə təltif olunub. Qeyd edək ki, Aytən Məmmədovanın yetirmələri 2022-ci ildə Respublika üzrə keçirilən ARTS OLİMPİA musiqi müsabiqəsində ikinci yerə layiq görülüb. Eyni zamanda Aytən Məmmədova özü Türkiyə-Azərbaycan respublikalarının birgə təşkil etdiyi "Altın Palmiye" mükafatlandırma mərasimində "İlin ən yaxşı musiqi müəllimi" nominasiyasında qalib olub.

Şəkidə 6 saylı uşaq evində "Novruz çiçəkləri" adlı konsert proqramı təşkil olunub. M.F Axundzadə adına Mədəniyyət Mərkəzi və Mədəniyyət İşçiləri Həmkarlar İttifaqı Şəki rayon komitəsinin birgə təşkilatçılığı ilə keçirilən tədbirdə əvvəlcə Novruz adət-ənənələrindən, inanclardan bəhs edilib. Ardınca "Hərəniz bir xonça" adlı yarış keçirilib. Görünüşü ilə fərqlənən xonçalar qalib olub. Şəki şəhər Uşaq İncəsənət Məktəbinin və Qax İngloy Mədəniyyət evinin "Mandali" və "Ketevan" gürcü rəqs qrupları öz çıxışları ilə tədbirə maraq qatıb. Novruzun əsas atributları Kosa ilə Keçəlin duzlu-məzəli zarafatları ilə şənlik iştirakçılarında ruh yüksəkliyi yaradıb. Konsert proqramı bahar qızın gəlişi ilə yekunlaşıb.

Baharın gəlişi münasibətilə başdan-başa bayram libası ilə bəzənib-düzənmiş Şamaxı göz oxşayır. Küçə və meydanlarda müasir işıqlandırma sistemləri tətbiq olunmaqla novruz atributları və baharın gəlişini özündə ehtiva edən digər qurğular quraşdırılıb. Rayonun giriş və çıxışında 9 və 5 metr hündürlüyündə səmənilər qurulub.

Yurdumuza qədəm qoyan baharı tərənnüm edən bu qurğuların quraşdırılması əhalidə xoş ovqat yaradıb, onların bayram sevincini daha da artırıb. Xüsusilə də gecə saatlarında Şamaxını bahar səması...