29 aprel- Beynəlxalq Rəqs Günü münasibətilə Şəkidə "Rəqsin ürəyi Şəkidə döyünür" adlı bayram konserti keçirilib. Şəki-Zaqatala Regional Mədəniyyət İdarəsinin dəstəyi, M.F.Axundzadə adına Mədəniyyət Mərkəzinin təşkilatçılığı ilə keçirilən tədbirə ölkənin bir çox şəhərlərindən rəqs qrupları qatılıb. Qax İngiloy Mədəniyyət Evinin "Ketavan" və "Mandili", Gəncə Dövlət Filarmoniyasının solistlərindən ibarət "Mübarək", Mingəçevir şəhərinin "Banu", Şəkinin musiqi və incəsənət məktəblərinin rəqs qrupları, eləcə də digər iştirakçılar bir-birindən maraqlı rəqsləri ilə tədbirə rəng qatıblar. Konsertdə milli rəqslərimizlə yanaşı, müxtəlif mədəniyyətlərə və millətlərə aid olan rəqs növləri də təqdim olunub və tamaşaçılar tərəfindən alqışlarla qarşılanıb.

Şəkinin Qayabaşı kəndinin sakinləri yaşadıqları ərazinin məişət tullantıları poliqonuna çevrilməsindən şikayətçidirlər. Antisanitar vəziyyət kəndi həm də sahibsiz heyvanların məskəninə çevirib. Zibillik əraziyə yığılan sahibsiz itllər, hətta vəhşi heyvanlar insanların təsərrüfatına da ziyan vurur.

Elə bir neçə gün əvvəl həmin zibillik ərazinin yaxınlığında yerləşən evlərdən birinə hücum edən sahibsiz itlər 4 baş xırdabuynuzlu heyvanı tələf edib.

Qeyd edək ki, məsələ barədə kənd icra nümayəndəliyindən mövqe öyrənmək istəsək də icra nümayəndəsi müxtəlif bəhanələrlə müsahibədən boyun qaçırdı. Necə ki, dəfələrlə sakinlərin də müraciətinə bu cür etinasız yanaşıb.

Ümid edirik, hələlik cana gəlincə, mala gələn bu təhlükə tezliklə aradan qalxar. Təbii ki, bunun üçün ilk növbədə vətəndaşların müraciətlərini diqqətə almalı olan məmurlar hər hansı tədbir görməlidir.

Rayon Polis Şöbəsinin təşkilatçılığı ilə keçirilən görüşdə məktəblilər əvvəlcə xidməti avtomobillər, xüsusi texniki vasitələr və avadanlıqlarla tanış olublar. Şagirdlərə polisin gündəlik xidməti fəaliyyəti, eləcə də ictimai asayişin təmin olunmasında və cinayətkarlığa qarşı mübarizədə görülən işlər barədə məlumat verilib. Daha sonra şöbənin inzibati binasında xidməti otaqlarla tanışlıq olub. Polis əməkdaşları iş prosesi ilə bağlı yeniyetmələri maraqlandıran sualları cavablandırıblar. Görüş məktəblilər tərəfindən də böyük maraqla qarşılanıb.

Şəki-Qax avtomobil yolunun Şəki rayonu Biləcik kəndi ərazisindən keçən hissəsində avtoqəza baş verib. Hərəkətdə olan “Toyota” və “Chevrolet” markalı minik avtomobilləri toqquşub.

Qəza zamanı sürücülər 46 yaşlı Qax rayon sakini Qoqita Babacanaşvili və 37 yaşlı Rəşad İsrafilov müxtəlif dərəcəli bədən xəsarətləri alıblar. Yaralılar Şəki Rayon Mərkəzi Xəstəxanasına yerləşdiriliblər. Faktla bağlı araşdırma aparılır.

Şamaxıda görkəmli oftalmoloq alim, Əməkdar elm xadimi, akademik Zərifə Əliyevanın anadan olmasının 101-ci ildönümünə həsr olunan tədbir keçirilib. Rayon İcra Hakimiyyəti və Mərkəzi Rayon Xəstəxanası Publik Hüquqi Şəxsin birgə təşkilatçılığı ilə keçirilən tədbirdə çıxış edənlər görkəmli akademikin həyat və fəaliyyətindən danışıblar. Vurğulanıb ki, Zərifə Əliyevanın tibbin müxtəlif sahələri üzrə apardığı tədqiqatlar, yaratdığı fundamental əsərlər Azərbaycan tibb elminin parlaq səhifələrini təşkil edir. Görkəmli alim yüksəkixtisaslı kadrların hazırlanmasına da böyük əmək sərf edib. Onun rəhbərliyi ilə gənc alimlər və həkim-oftalmoloqlar nəsli yetişib.

Həmçinin qeyd olunub ki,, Ümummilli Lider Heydər Əliyevin ömür-gün yoldaşı olan Zərifə xanım nəcib Azərbaycan qadını, vəfalı həyat yoldaşı, fədakar ana obrazının parlaq təcəssümüdür. Tədbirin sonunda Zərifə Əliyevanın həyat və fəaliyyətinə həsr olunan qısametrajlı film nümayiş olunub.