Şəkinin Aşağı Layısqı və Köndələn kənd məktəbləri onlar avtomobillərin sıx hərəkət etdiyi Şəki -Qax magistralının bir neçə addımlığında yerləşir. Bu Təhsil ocaqlarının qarşısında piyada keçidi olsa da nə işıqfora, nə də xəbərdaredici nişanlara rast gəlinir. Məktəblərdə təhsil alan uşaqlar hər gün dərsə gedərkən çox böyük cəsarət göstərirlər. Çünki azyaşlıların ani səhvi həyatları bahasına başa gələ bilər. Analoji hal Şəkinin 21 nömrəli tam orta məktəbinin də qarşısında yaşanır. Məktəb avtomobillərin sürətlə şütüdüyü Şəki-Oğuz magistralının keçdiyi ərazidə yerləşir. Nəinki, uşaqlar hətta böyüklər belə bu yoldan keçərkən çox ehtiyatlı davranmalı olurlar. Ərazidə dəfələrlə yol qəzaları yaşandığından məktəblilər və onların valideynləri vəziyyətdən çox narahatdır. Yolda piyada xətti və işıqforun olması belə, ərazidən keçidi heç də asanlaşdırmır. Məsələylə bağlı Daxili İşlər Nazirliyinin Mətbuat Xidmətindən bildirildi ki, bu cür ərazilərdə yerləşən təhsil müəssisələri daim nəzarət altındadır. Polis əməkdaşları ərazidə müvafiq təhlükəsizlik işləri görür. Daxili İşlər Nazirliyinin əməkdaşı həmçinin bildirir ki, həmin ərazilərdə vaxtaşırı müayinələr aparılır, zəruri yol nişanları quraşdırılır, piyada zolaqları çəkilir. Eyni zamanda qaydaları pozan sürücülər cərimələnir və maarifləndirici söhbətlər aparılır. Ümid edirik ki, bu cür ərazilərdə yerləşən təhsil müəssisələrinə daha diqqətlə yanaşılar. Və problem aradan qaldırılar.