İsmayıllıda polis əməkdaşlarının keçirdikləri tədbirlər zamanı “VAZ-2107” markalı avtomobilin sürücüsü Ülvi Qaçayev ötmə qaydasını pozduğu üçün ona “saxla” işarəsi verilib. Sənədləri yoxlanılarkən Ü.Qaçayevin sürücülük hüququnun olmadığı məlum olub. Həmçinin onun narkotik vasitə qəbul etdiyinə dair şübhələr yarandığından sürücü tibbi müayinədən keçirilib. Nəticədə Ü.Qaçayevin narkotik vasitə olan marixuana istifadə etdiyi müəyyənləşib.Məhkəmənin qərarı ilə sürücü 15 sutka inzibati qaydada həbs edilib.

Şəkidə veteran idmançılarla görüş keçirilib. Şəhidlər Xiyabanında baş tutan görüşdə idmançılar şəhidlərimizin məzarı önünə gül dəstələri qoyub, xatirələrini yad ediblər.

Torpaqlarımızın düşmən işğalından azad edilməsi uğrunda şəhid olan həmvətənlərimizə Allahdan rəhmət, qazilərimizə şəfa diləyiblər.

Tədbirdə həmçinin döyüş və diplomatiya meydanında qazanılmış Zəfərimizin idman yarışlarında da uğurla davam etdirilməsindən bəhs olunub, idmanın ölkəmizdə daim diqqət mərkəzində olduğu vurğulanıb.

Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Şəki və Oğuz rayonlarında mövsümün ilk toxum sərgi-satış yarmarkası və Aqrar Biznes Festivalı keçirilib.

Şəki şəhərindən start götürən toxum sərgi-satış yarmarkasında payızlıq dənli bitkilərin əkini üçün yüksək reproduksiyalı, sertifikatlı toxumlar nümayiş olunub.

Sərgidə Kənd Təsərrüfatı Nazirliyinin qurumları və digər dövlət müəssisələri, yerli toxum istehsalçıları, iri toxum istehsalı və satışı ilə məşğul olan şirkətlər eləcə də kənd təsərrüfatının digər sahələrində ixtisaslaşmış yerli şirkətlər iştirak ediblər.

Yarmarkada Şəki-Zaqatala iqtisadi rayonu üzrə Şəki, Oğuz, Qəbələ, Şamaxı, İsmayıllı, Zaqatala, Balakən və Qax rayonlarından fermerlər qatılıblar.

Sərgidə həmçinin kənd təsərrüfatı təyinatlı müxtəlif texnika və aqreqatlar, innovativ suvarma texnologiyaları, alternativ enerji mənbələri, pambıq əkinində tətbiq olunan yeni texnologiyalar, müasir texnologiyalar əsasında əldə olunmuş əkin materialları və bitki mühafizə vasitələri nümayiş olunub.

Bu gün mərhum Xalq şairimiz Bəxtiyar Vahabzadənin 99-cu ildönümüdür. Bu münasibətlə Şəki-Zaqatala Regional Mədəniyyət İdarəsinin tabeliyində fəaliyyət göstərən Bəxtiyar Vahabzadə adına ev muzeyində tədbir keçirilib.

Əvvəlcə adını daşıdığı parkda B.Vahabzadənin büstü ziyarət edilib, önünə gül dəstələri qoyulub. Daha sonra ev muzeyində davam edən tədbirdə Şəki-Zaqatala Regional Mədəniyyət İdarəsinin əməkdaşları, ziyalılar və şəhər sakinləri iştirak edib.

Çıxış edənlər bu tədbirin keçirilməsində təşəbbüs göstərənlərə şairimizin xatirəsini unudulmağa qoymadıqlarına görə təşəkkür edib, tədbirin əhəmiyyətinin böyük olduğunu vurğulayıblar. Daha sonra tədbir xalq çalğı alətlərində musiqi ifaları və çay süfrəsi ilə davam edib.

Şəkidə çəkisi 126 kiloqram olan 397 ədəd çətənə kolu aşkarlanıb. Şəki Şəhər Rayon Polis Şöbəsinin əməkdaşları tərəfindən narkotik tərkibli bitkilərin kultivasiyası və satışı ilə məşğul olan Cövhər Xəlilzadə və qohumu Sənan Hacıyev saxlanılıblar. Onların rayonun Daşüz kəndindəki meşəlik ərazidə narkotik tərkibli bitkilər əkib-becərdikləri müəyyən edilib. Həmin yerə baxış keçirilərkən çəkisi 126 kiloqram olan 397 ədəd çətənə kolu və satış məqsədilə saxladıqları 2 kiloqram marixuana aşkar olunub. C.Xəlilzadə və qohumu S.Hacıyev narkotik tərkibli bitkiləri qazanc əldə etmək məqsədilə əkdiklərini və aqrotexniki qayeada qulluq göstərdiklərini bildiriblər. Fakla bağlı Cinayət İşi başlanılıb. Məhkəmənin qərarı ilə C.Xəlilzadə və S.Hacıyev barəsində həbs qətimkan tədbiri seçilib. Dəstənin digər üzvlərinin müəyyən edilərək saxlanılmaları istiqamətində zəruri əməliyyat-istintaq tədbirləri davam etdirilir.

Zaqatalada ölümlə nəticələnən yol qəzası olub. Hadisə dünən axşam saatlarında Zaqatala şəhəri, Eldar Ağayev küçəsində baş verib. 35 yaşlı Cavid Dibirov idarə etdiyi “VAZ 2103” markalı minik avtomobili ilə hərəkətdə olarkən piyada 69 yaşlı, rayonun Yuxarı Tala kənd sakini Əli Əliyevi vurub.

Şəki Şəhər Rayon Polis Şöbəsinin əməkdaşları tərəfindən qanunsuz odlu silah-sursat saxlayan, narkotik vasitələrin satışı və əkini ilə məşğul olan şəxslərə qarşı əməliyyatlar keçirilib. Tədbirlərlə rayon sakini, 33 yaşlı Elvin Hüseynzadə saxlanılıb.

Onun idarə etdiyi avtomobildən “Kalaşnikov” avtomatı, daraq və 29 ədəd patron, eləcə də narkotik vasitə marixuana aşkarlanıb. Saxlanılan şəxs odlu silahı satmaq məqsədilə nəqliyyat vasitəsində daşıdığını bildirib. Keçirilən digər əməliyyat zamanı isə narkotiklərin satışı ilə məşğul olan, əvvəllər də analoji əmələ görə dəfələrlə məhkum olunmuş Mirseyid Ağababayev saxlanılıb.

Ondan 2 kiloqram marixuana və kultivasiya edərək yetişdirdiyi çətənə bitkiləri aşkarlanıb. Faktlarla bağlı cinayət işi başlanılıb, məhkəmənin qərarı ilə hər iki şəxs barəsində həbs qətimkan tədbiri seçilib. Araşdırmalar davam etdirilir.