Dahi bəstəkar, Azərbaycan klassik musiqisinin banisi, musiqişünas, alim və görkəmli ictimai xadim Üzeyir Hacıbəylinin anadan olmasının 140 illiyi və Milli Musiqi Günü münasibətilə Şəki şəhər Heydər Əliyev Mərkəzində konsert olub. Şəki-Zaqatala Regional Mədəniyyət İdarəsinin təşkilatçılığı ilə keçirilən tədbirdə konsertdə çıxış edənlər dahi bəstəkarın zəngin irsindən, Azərbaycan musiqi tarixində oynadığı roldan, dünya musiqisinə gətirdiyi yeniliklərdən söz açıblar. Şəki şəhər 3 nömrəli Uşaq Musiqi Məktəbinin müəllimlərdən ibarət ansamblının və xorun ifasında Ü.Hacıbəylinin “Koroğlu” operasından “Uvertüra”, “Çənlibel” xoru, “Leyli və Məcnun” operasından “Müqəddimə”, həmin əsərdən “Bu gələn yara bənzər”, “Şəbi-hicran”, “Aşıqsayağı” triosu, “Cəngi”, “Arazbarı”, “Arşın mal alan” operettasından “Müqəddimə”, “Sənsiz” romansı və digər əsərlər səsləndirilib.

Şəkinin Aşağı Göynük kəndi ərazisində 860 hektar biçilmiş taxıl və örüş-otlaq sahəsini yandıran şəxslər saxlanılıblar. Şəki Rayon Polis Şöbəsinin əməkdaşları tərəfindən həyata keçirilən tədbirlərlə həmin şəxslərin rayon sakinləri - 48 yaşlı Məzahir Sadıqov və 40 yaşlı Asif Mahmudov olduqları müəyyən edilib. Onların özlərinə məxsus pay torpaq sahəsini şumlamağa hazır vəziyyətə gətirmək üçün qəsdən yandırdıqları və nəticədə yanğının daha böyük ərazini əhatə etdiyi məlum olub. Faktla bağlı Cinayət Məcəlləsinin müvafiq maddəsi ilə cinayət işi başlanılıb, hər iki şəxs barəsində həbs qətimkan tədbiri seçilib. Araşdırmalar davam etdirilir.